وليمپيادا چەمپيونى دانيار ەلەۋسىنوۆ الداعى جوسپارىمەن ءبولىستى

استانا. قازاقپارات - ريو وليمپياداسىنىڭ چەمپيونى دانيار ەلەۋسىنوۆ ازداپ دەمالعان سوڭ ەل چەمپيوناتىنا دايىندىقتى باستاپ كەتەتىنىن ايتتى، دەپ حابارلايدى «قازاقپارات» ح ا ا ءتىلشىسى.

«قازىرگى ۋاقىتتا مەن دەمالىپ جاتىرمىن. الايدا، دەمالىسپەن قاتار، جاتتىعۋدى دا ۇمىت قالدىرعىم كەلمەيدى. الەم چەمپيوناتىنان كەيىن قازاقستان چەمپيوناتىنا دايىندالامىن. ۇلتتىق قۇرامامەن جۇمىستى ارى قاراي جالعاستىرا بەرمەكپىن. ودان ارى ەكىنشى، ءۇشىنشى وليمپيادالاردى كورە جاتارمىز...»، - دەيدى چەمپيون.

ءوزىنىڭ كاسىبي بوكسقا اۋىسۋى تۋرالى ءبىر كەزدەگى جوسپارىن دانيال ەلەۋسىنوۆ كەلەسىدەي ءتۇسىندىرىپ بەردى.

«ءبارىن ۋاقىت كورسەتەر... كاسىبي بوكسقا اۋىسۋ كەش بولا قويماس. كەلىپ جاتقان ۇسىنىستارعا بايلانىستى شەشىمىمدى سارالارمىن. ءدال قازىرگى ۋاقىتتا قىزىعارلىقتاي ۇسىنىس بولعان جوق. سوندىقتان، كۇتە تۇرامىن. ەشكىممەن كەلىسىمگە قول قويعان جوقپىن.  قىزىققانىممەن، مەنىمەن وسى ماسەلەنى تالقىلاعان اۆستراليالىق پروموۋتەرلىك كومپانيا ءالى جۇمىسىن باستاعان جوق»، - دەيدى دانيار.

وليمپيادا چەمپيونى سونداي-اق، 2017-جىلدىڭ قىركۇيەگىندە گامبۋرگتە وتكەلى جاتقان الەم چەمپيوناتىنا قاتىستى پىكىرىن ءبىلدىردى.

«ءبىزدىڭ كوماندا جاس ءارى ونىڭ جەڭىسكە قۇلشىنىسى زور. سوندىقتان، كەم دەگەندە 1-2 التىن مەدال الىپ كەلۋى كەرەك»، - دەدى دانيار ەلەۋسىنوۆ.

ەسكە سالا كەتسەك، دانيار ەلەۋسىنوۆ قازاقستاننىڭ وزگە دە تانىمال سپورتشىلارىمەن بىرگە استانا حالىقارالىق ش ى ۇ مارافونىنا قاتىسادى. حالىقارالىق مارافون 27- تامىزدا تاڭەرتەڭگى 07:30 ۋاقىتىندا باستالادى.

اۆتور: ايان بەكەن ۇلى