زاڭ جوباسى: قوعامدىق ورىنداردا تۇمشالانعان كيىم كيۋگە شەكتەۋ قويىلماق
اتالعان وتىرىسقا قازاقستان مۇسىلماندارى ءدىني باسقارماسىنىڭ باسشىلىق قۇرامى، يمامدار، «ۋاقىپ» قايرىمدىلىق قورىنىڭ جانە ءدىن ماسەلەلەرى جونىندەگى عىلىمي- زەرتتەۋ جانە تالداۋ ورتالىعىنىڭ وكىلدەرى مەن ءدىنتانۋشى عالىمدار قاتىستى.
ءدىن تانۋ ساراپتاماسى باسقارماسىنىڭ باسشىسى مىرزايەۆ بالعابەك زاڭ جوباسىنا ەنگىزىلەتىن جاڭاشىلدىقتارعا توقتالدى. ونىڭ سوزىنشە، قۇجاتتا شەتەلدە ءدىني ءبىلىم الۋ، قوعامدىق ورىنداردا ادامنىڭ بەت-بەينەسىن تۇمشالايتىن كيىم تۇرلەرىن كيۋدى شەكتەۋ، ءدىن قىزمەتىنە مەملەكەتتىك قىزمەتكەرلەردىڭ قاتىسۋى، ءدىن جورالعىلارى بويىنشا نەكەنى قيعىزۋعا قاتىستى جاڭا نورمالار قابىلداناتىن بولادى.
بۇدان بولەك، زاڭ جوباسى اياسىندا دەسترۋكتيۆتى يدەولوگيالىق اعىمداردىڭ كيىم تۇرلەرىن كيۋگە شەكتەۋ قويۋ، ب ا ق- تا ولاردى جارنامالاۋعا جانە نانىم-سەنىمدەرىن تاراتۋعا تىيىم سالۋ، ءدىني قىزمەتكە كامەلەتتىك جاسقا تولماعانداردى تارتقانى ءۇشىن جاۋاپكەرشىلىكتى كۇشەيتۋ قاراستىرىلادى.
وتىرىس بارىسىندا قاتىسۋشىلار ءدىن ماسەلەلەرى بويىنشا زاڭنامالىق اكتىلەرگە ەنگىزىلەتىن تۇزەتۋلەردىڭ ماڭىزدىلىعىنا توقتالدى. ولاردىڭ ايتۋىنشا، زاڭ جوباسى ءدىني ەكسترەميزم يدەولوگيالارىنىڭ تاراپ كەتۋىنىڭ الدىن الۋ بويىنشا جالپى مەملەكەتتىك جۇيەنى قالىپتاسىرۋ جانە مەملەكەتتىڭ زايىرلى قاعيداتتارىن كۇشەيتۋگە نەگىز بولا الادى.
ەستەرىڭىزگە سالا كەتەيىك، اتالعان زاڭ جوباسىنىڭ تولىق نۇسقاسى ق ر ءدىن ىستەرى جانە ازاماتتىق قوعام مينيسترلىگىنىڭ رەسمي سايتىندا جانە «ەلەكتروندىق ۇكىمەت» پورتالىندا جاريالانعان.
