الماتى كوشەلەرىندە تەگىن تاماق بەرەتىن توڭازىتقىش پايدا بولادى

استانا. قازاقپارات - الماتى كوشەلەرىندە تۇرعىندار ارتىق تاعامدارىن وتكىزۋگە بولاتىن توڭازىتقىشتار پايدا بولماق.

قايىرىمدىلىق اكسياسى جونىندە اقپاراتتى ۇيىمداستىرۋشىلاردىڭ ءبىرى - اليحان بايقوڭىروۆ ءوزىنىڭ فەيسبۋكتەگى پاراقشاسىندا حابارلادى.

«سىزدەر دەمالۋعا الىس ساپارعا اتتانعان سايىن ۇيلەرىڭىزدە بۇزىلىپ كەتۋى مۇمكىن ازىق-تۇلىك مىندەتتى تۇردە قالادى. نەمەسە مەرەكەلىك كەشتەردەن سوڭ جەپ تاۋىسۋىڭىز مۇمكىن بولمايتىنداي ازىق- تۇلىك قالىپ جاتادى، بۇزىلعان سوڭ ونى تاستايسىزدار. بەكەر ىسىراپ... سونداي-اق، تاماق ونىمدەرىنە قاتىسى بار ورىنداردان دا كۇنىنە بىرنەشە كەلى ازىق-تۇلىك بەكەر قوقىسقا كەتەدى»، - دەپ جازدى اليحان بايقوڭىروۆ.

اتالمىش جاعدايلاردى ەسكەرگەن ەر ادام «قايىرىمدىلىق توڭازىتقىشى» اكسياسىن ۇيىمداستىرۋدى ۇسىندى.

اليحاننىڭ ايتۋىنشا، مۇنداي توڭازىتقىشتاردى ول العاش رەت دەنۆەر كوشەلەرىنەن كورگەن. ءار داڭعىلدا، سونداي-اق، ءىرى دۇكەندەردىڭ الدىندا جاعدايى مۇشكىل وتباسىلار مەن زەينەتكەرلەرگە ارنالعان تەگىن تاماق بەرەتىن توڭازىتقىشتار ورنالاسقان.

«تۇرعىندار ازىق-تۇلىكتى كوپتەپ اكەلەدى جانە قاشان اكەلگەندەرىن جازىپ كەتەدى. ال جاعدايى جوقتار تەگىن الىپ تۇرادى. تاماشا وي! مەنىڭ دە ۇيىمدە جەلىنبەي قالاتىن تاماقتار كوپ بولادى. ولاردى قوقىسقا تاستاۋعا قولىڭ بارمايدى»، -  دەپ جازدى اۆتور.

توڭازىتقىشتار ءالى ورنالاسپاعان، الايدا ورنالاستىرۋ جۇمىستارى جۇرگىزىلۋ ۇستىندە. اليحان بايقوڭىروۆ توڭازىتقىشتاردى قوياتىن ىڭعايلى ورىن قاراستىرىپ جۇرگەندەرىن جازدى. ءارى الماتى تۇرعىندارىنان قايىرىمدى ىسكە اتسالىسۋدى سۇرادى.

 Qamshy.kz