ديماشتىڭ قىتايداعى كونسەرتىنەن شۋ شىقتى - كەسكىن

استانا. قازاقپارات - قازاقستاندىق تانىمال ءانشى ديماش قۇدايبەرگەن 19 -تامىز كۇنى قىتاي استاناسى بەيجىڭدە وتكەن 爱奇艺 (iqiyi.com) ۆيدەو- حوستينگىنىڭ تىكەلەي تاراتىلىمداعى كونسەرتىندە ءان شىرقادى، دەپ حابارلايدى قازاقپارات ءتىلشىسى.

كونسەرتتەن كەيىن ديماشتىڭ جانكۇيەرلەرى Weibo الەۋمەتتىك جەلىسىندە شارانى ۇيىمداستىرۋشىلاردىڭ ديماشتان كەشىرىم سۇراۋىن تالاپ ەتتى. جانكۇيەرلەردىڭ ايتۋىنشا، ساحناداعى ۇلكەن LED- ەكراندا ديماشتىڭ قىتايشا جازىلعان اتى 迪玛西（迪玛希）دەپ قاتە جازىلعان.

سونداي-اق، ولار ءانشىنىڭ مۋزىكانى ەستۋگە ارنالعان ناۋشنيگى مەن اۋەن مينۋسوۆكاسىندا اقاۋدىڭ بولۋى جانە ەكرانداعى ءان ءسوزىنىڭ دۇرىس كورىنبەۋى سياقتى كەلەڭسىز جايتتەر شارانى ۇيىمداستىرۋشىلاردىڭ شالاعايلىعىنان دەپ وتىر.

ايتا كەتەرلىگى، كونسەرتكە ديماشتىڭ جانكۇيەرلەرى كوپتەپ جينالدى. سونىمەن قاتار ۆيدەو- حوستينگىندە ديماشى شىرقاعان اندەردىڭ كورسەتىلىمى ەڭ جوعارى بولدى.

اۆتور: مۇحتار قاليموللا ۇلى