15:38, 18 - تامىز 2017 | GMT +5
ەلباسى بارسەلونادا بولعان تەراكتىگە بايلانىستى يسپانيا كورولىنە كوڭىل ايتتى
استانا. قازاقپارات - قازاقستان پرەزيدەنتى يسپانيا كورولى VI فەليپەگە بارسەلونا قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى تەررورلىق اكت سالدارىنان كوپتەگەن ادامنىڭ قازا بولعانى تۋرالى حاباردى زور كۇيزەلىسپەن قابىلدادى.
«قازاقستان بەيبىتشىلىك پەن قاۋىپسىزدىككە قارسى باعىتتالعان بۇل جانتۇرشىگەرلىك ارەكەتتى قاتاڭ ايىپتايدى جانە تەرروريزممەن كۇرەستە جاھاندىق ىنتىماقتاستىقتى كەڭەيتۋدى قولدايدى»، - دەلىنگەن جەدەلحاتتا.
نۇرسۇلتان نازاربايەۆ قازاقستان حالقىنىڭ جانە جەكە ءوزىنىڭ اتىنان قازا بولعانداردىڭ وتباسىلارى مەن جاقىندارىنا، بارشا يسپان حالقىنا، سونداي-اق يسپانيا كورولى VI فەليپەگە كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
