كونە سارايشىق شاھارى اشىق اسپان استىنداعى مۋزەيگە اينالۋى مۇمكىن

استانا. قازاقپارات - ەلىمىزدەگى كونە قالالاردىڭ ءبىرى قازىرگى اتىراۋ وبلىسى اۋماعىندا ورنالاسقان.

قازاق حاندىعىنىڭ استاناسى بولعان سارايشىقتا بۇگىندە ارحەولوگ- عالىمدار قازبا جۇمىستارىن جۇرگىزىپ جاتىر. بۇعان سەبەپ تاياۋدا رەسەي مۇراعاتىنان تابىلعان ەجەلگى شاھاردىڭ كونە سىزبالارى، دەپ حابارلادى بۇگىن 24.kz.

ەسكى شاھاردىڭ ورنىنداعى مىڭ جارىم شارشى مەتر اۋماقتاعى قازبا جۇمىستارى ءۇزىلىسسىز ءجۇرىپ جاتىر. عالىمدار مەن تاريح فاكۋلتەتىنىڭ ستۋدەنتتەرى ارشىلعان جەردىڭ توپىراعىن ءسۇزىپ، تابىلعان ءار زاتتىڭ سىرىنا ۇڭىلۋدە. 1,5 مەترلىك تەرەڭدىكتەن تابىلعان تيىندار مەن اشەكەي بۇيىمداردى ماماندار XVII عاسىردا سوعىلعان دەيدى.

«بەت جاعىنان ورتاعاسىرلىق مونەتالار تابىلىپ جاتىر. سونىمەن قاتار قاپتاما پليتا تابىلدى. بۇل - سول ۋاقىتتا ۇلكەن عيماراتتاردىڭ سىرتىن قاپتاعان، سىرلى بوياۋمەن بويالعان تاس»، - دەيدى وبلىستىق تاريحي- ولكەتانۋ مۋزەيى عىلىمي- زەرتتەۋ سەكتورىنىڭ مەڭگەرۋشىسى باقىتگۇل حاسانوۆا.

تەلەارنا سايتىنىڭ حابارلاۋىنشا، تاياۋدا ماسكەۋ مۇراعاتىنان كونە قالانىڭ سىزباسى تابىلعان. تاريحشىلاردىڭ ءۇمىتىن وياتقان دا وسى دەرەك. 1760 -جىلدارى ەلىمىزدىڭ باتىس ءوڭىرىن ارالاعان رەسەيلىك عالىمدار توبى سارايشىق قالاسىنىڭ ورنالاسۋ ءتارتىبىن، ساقتالعان عيماراتتاردى انىقتاپ، قاجەتتى جەرلەرىنە بەلگى سوعىپ قويعان ەكەن. وتاندىق عالىمدار وسى كارتانى كادەگە جاراتقان.

«بۇل ءبىز قاراستىرعان سارايشىق قالاسىنىڭ تەڭ جارتىسىسنان كوبىن سۋ شايىپ كەتتى دەگەن جوبا دۇرىس بولماي شىقتى. ويتكەنى كارتا بويىنشا سارايشىقتىڭ 80 پايىزى تولىق ساقتالعانىن كورسەتىپ وتىر. سول كارتا بويىنشا XVIII عاسىرداعى بۇرىن ءبىز تەك اڭىز دەپ جۇرگەن كوپتەگەن نارسەنىڭ جوباسى انىقتالدى. ول كارتادا جانىبەكتىڭ سەكەر كولىنىڭ ورنى، حان كولى دەگەن كولدەردىڭ ورنى بەلگىلى وتىر. سونىمەن بىرگە قاسىمحاننىڭ كەسەنەسىنىڭ ورنى دا وسى كارتادا جاقسى كورسەتىلگەن»، - دەيدى ارحەولوگيالىق ەكسپەديتسيانىڭ جەتەكشىسى مارات قاسەنوۆ.

عالىمداردىڭ تاپقان تىڭ دەرەكتەرى قازاق ەلىنىڭ تاريحىن زەرتتەۋگە ۇلەس قوسارى انىق. كونە قالاداعى قازبا جۇمىستارى قار تۇسكەنگە دەيىن جالعاسادى. ەكسپەديتسيا جۇمىسىنىڭ ناتيجەلى جۇرۋىنە بارلىق جاعداي جاسالعان. سارايشىقتى زەرتتەۋ كەلەر جىلى دا جالعاسادى. ال ودان كەيىنگى كەزەكتە ەجەلگى شاھاردى اشىق اسپان استىنداعى مۋزەيگە اينالدىرۋ ءىسى جوسپارلانىپ وتىر، دەپ جازادى 24.kz.