تۇركى اكادەمياسى موڭعوليادا حالىقارالىق دالا سەمينارىن ۇيىمداستىردى

استانا. قازاقپارات - موڭعوليانىڭ كەنتاي ايماعىندا تۇركى اكادەمياسى حالىقارالىق ۇيىمى (TWESCO) مەن موڭعوليا ۇلتتىق مۋزەيىنىڭ قولداۋىمەن ۇيىمداستىرعان «كەنتايدان ۇلىتاۋعا دەيىن: تاريحي جادىنىڭ جاڭعىرۋى» اتتى Ⅲ حالىقارالىق ەكسپەديتسيا اياسىندا حالىقارالىق دالا سەمينارى ءوتتى.

TWESCO سايتىنىڭ حابارلاۋىنشا، عىلىمي شاراعا اكادەميا باسشىسى دارحان قىدىرالى، موڭعوليا ۇلتتىق مۋزەي ديرەكتورى د. ءسۇحبااتار باستاعان كورنەكتى تاريحشى، ارحەولوگ جانە تۇركىتانۋشى عالىمدار مەن ەكى ەلدىڭ بەلدى بۇقارالىق اقپارات قۇرالدارىنىڭ وكىلدەرى قاتىستى.

حالىقارالىق ەسكپەديتسيا مۇشەلەرى سەمينار الدىندا شىڭعىس حاننىڭ تۋعان جەرى - بۋرحان حالدۋن تاۋىنا شىقتى.

ەكسپەديتسيالىق توپ وسى ايماقتاعى حاياا حۋداگ جانە گۇنبۇرد كونە تۇركى عۇرىپتىق كەشەندەرىنە ارحەولوگيالىق قازبا جۇمىستارىن جۇرگىزىپ، جان-جاقتى زەرتتەيدى دەپ جوسپارلانعان.

موڭعوليا جەرىنە وسىمەن ءۇشىنشى رەت ۇيىمداستىرىلعان بۇل ەكسپەديتسيا قازاقستان مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا كوتەرىلگەن قاستەرلى جەرلەر مەن تاريحي سانانى جاڭعىرتۋدى ماقسات تۇتادى.

ايتا كەتەرلىگى، ەكسپەديتسياعا قاتىسۋشىلار موڭعوليا مەن قازاقستانداعى كونە تۇركى تاريحى ءۇشىن ماڭىزدى جەرلەردى ءجۇرىپ وتەدى. وسىلايشا بۋرحان حالدۋن تاۋىنان باستالعان ەكسپەديتسيا ۇلىتاۋداعى الاشا حان، جوشى حان كەسەنەسىنە دەيىن جالعاساتىن بولادى.