قىتايداعى كورنەكتى ادەبيەتتانۋشى، باسپاگەر، اقىن ءتالىپباي قابايەۆ ومىردەن وزدى
بۇل تۋرالى فيلولگيا عىلىمدارىنىڭ دوكتورى، پروفەسسور دۇكەن ءماسىمحان ۇلى ءوزىنىڭ فەيسبۋكتەگى پاراقشاسىندا ءمالىم ەتتى.
«ءۇرىمجى قالاسىنان بوزالا تاڭمەن بىرگە جاندى بوزداتار قارالى حابار جەتتى. قازاق رۋحانياتى اۋىر قازاعا ۇشىرادى.
كورنەكتى ادەبيەتتانۋشى- عالىم، ايگىلى باسپاگەر، شىنجاڭداعى قازاق رۋحانياتىنىڭ قاتەپتى قارا نارى ءتالىپباي قابايەۆ بۇگىن (17.08.2017) تاڭەرتەڭ ماڭگىلىكتىڭ كەمەسىنە ءمىنىپ، باقيلىق مەكەنىنە اتتانىپ كەتىپتى.
ت. قابايەۆ 1935 -جىلى ق ح ر تەكەس اۋدانىندا ومىرگە كەلگەن. 1957 -جىلى شىنجاڭ ينستيتۋتىنىڭ (قازىرگى شىنجاڭ ۋنيۆەرسيتەتى) فيلولوگيا فاكۋلتەتىن بىتىرگەن. ۋنيۆەرسيتەتتى بىتىرگەننەن كەيىن جولدامامەن قازىرگى شىنجاڭ جاستار-ورەندەر باسپاسىنا رەداكتور بولىپ جۇمىسقا تۇرادى. كۇللى سانالى عۇمىرىن قازاق باسپا سوزىنە ارناعان، "مادەني توڭكەرىس" جىلدارىندا "تارىم" لاگەرىنىڭ تاقسىرەتىن اتتاي جيىرما جىل تارتقان ول، اقتالىپ كەلگەننەن كەيىن وسى باسپادان دەمالىسقا شىققان بولاتىن.
مارقۇمنىڭ وتباسى، بالا-شاعاسىنا قايعىلارىنا ورتاقتاسىپ كوڭىل ايتامىز! اعامىزدىڭ جانى ءجانناتتا، يمانى جولداس بولسىن!»، - دەپ جازدى ءماسىمحان ۇلى.
