بەيجىڭدە استاناداعى جەڭىل رەلستى كولىك قۇرىلىسىن جەدەلدەتۋ ماسەلەسى تالقىلاندى
ش. نۇرىشيەۆ بيىل ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 25 جىل تولعانىن اتاپ ءوتتى.
«بۇل ۋاقىت ارالىعىندا ءبىزدىڭ ساياسي، ساۋدا-ەكونوميكالىق، كولىك جانە مادەني-گۋمانيتارلىق سالالارداعى ءوزارا ارەكەتتەستىك قارقىندى دامىدى. ق ح ر ءتوراعاسى سوڭعى ءتورت جىلدا قازاقستانعا ءۇش رەت كەلدى، بۇل ءبىزدىڭ ءوزارا قارىم-قاتىناسىمىزدىڭ جوعارى دەڭگەيىنىڭ ايعاعى»، - دەدى ول.
تاراپتار ايماقارالىق ءوزارا ارەكەتتەستىك پەن ق ر قالالارىمەن جانە وبلىستارىمەن بايلانىس ورناتۋدىڭ كەلەشەگىن تالقىلادى. قازاقستان ەلشىسى قىركۇيەك ايىندا ق ح ر گۋانشي-چجۋان اۆتونومدى ايماعىنىڭ ناننين قالاسىندا وتەتىن ايماقارالىق ىنتىماقتاستىق فورۋمى اياسىندا ءوزارا بايلانىستى نىعايتۋعا شاقىردى.
كەزدەسۋدە استاناداعى جەڭىل رەلستى كولىك (LRT) جۇيەسىنىڭ قۇرىلىسىن جەدەلدەتۋ تۋرالى استانا اكىمى اسەت يسەكەشەۆ پەن بەيجىڭ مەرى تساي تسي اراسىنداعى ۋاعدالاستىقتى جۇزەگە اسىرۋدى تالقىلاۋعا ەرەكشە كوڭىل ءبولىندى. وندا جوبانىڭ يندۋستريالدى-ينۆەستيتسيالىق ىنتىماقتاستىق باعدارلاماسىنا ەنەتىنى جانە ونى تابىستى جۇزەگە اسىرۋدىڭ ەكى ەل اراسىنداعى دوستىقتىڭ جوعارى دەڭگەيىن كورسەتۋ قاجەتتىگى باسا ايتىلدى.
