ءبىز كوكپاردىڭ «كەنجەسىمىز» - امەريكالىق كوۆبوي

استانا. قازاقپارات - استاناداعى «قازانات» يپپودرومىندا بۇگىن امەريكالىق كوۆبويلار باسپا ءسوز ءماسليحاتىن وتكىزدى.

قۇرلىق اسىپ كەلگەن مەيماندار ەلوردادا جۋىق ارادا باستالاتىن الەمدىك كوكپار ويىنىنا ارنايى كەلىپ وتىر، دەپ حابارلايدى «قازاقپارات» ح ا ا ءتىلشىسى.

«قازاناتتاعى» كوۆبويلاردىڭ جيىنىنا سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ، ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان، قازاقستانداعى ا ق ش- تىڭ توتەنشە جانە وكىلەتتى ەلشىسىنىڭ ورىنباسارى دجون مارك پەن امەريكالىق كوۆبوي كومانداسىن باستاپ كەلگەن كريد گارنيك كەلدى. «قايىرلى كۇن قۇرمەتتى حانىمدار مەن مىرزالار!» دەپ ءسوزىن قازاقشا باستاعان دجون مارك چەمپيوناتتى ۇيىمداستىرىپ وتىرعان قازاقستان تاراپىنا العىسىن ءبىلدىردى.

«مۇنداي چەمپيوناتتىڭ مىڭ جىل بۇرىن جىلقىنى قولعا ۇيرەتكەن اقمولا وڭىرىندە بولىپ جاتقانى قۋانتادى. مەن قازاقتار ءۇشىن دە، كوۆبويلار ءۇشىن دە جىلقىنىڭ ورنى بولەك ەكەنىن بىلەمىن. كوۆبويلار ۇلكەن دايىندىقپەن كەلدى. مەن جىلقىعا دەگەن قۇرمەت ا ق ش پەن قازاقستاندى جاقىنداستىرا تۇسەتىنىنە سەنىمدىمىن. امەريكالىق كوماندا الداعى كۇندەرى وزدەرىنىڭ ات ۇستىندەگى شەبەرلىكتەرىن كورسەتەدى. سوندىقتان بارىنە اق جول تىلەيمىن!»، - دەدى دجون مارك.

ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان كوكپار ويىندارىنا جالپى جيىنى 18 ميلليون ا ق ش دوللارى تىگىلىپ وتىرعانىن ايتتى. قاۋىمداستىق باسشىسى ا ق ش ەلشىلىگىنە شىنايى ريزاشىلىعىن ءبىلدىرىپ، ەكى ەلدىڭ قارىم- قاتىناسى تۋرالى ءسوز قوزعادى. ونىڭ ايتۋىنشا، قازاقستان كوكپار چەمپيوناتىن وتكىزۋگە تاس-ءتۇيىن دايىن.

«كوكپار ويىندارى بەس كۇن بويى ۇزدىكسىز وتكىزىلەدى. اقتىق سايىس 27 -تامىزدا وتەدى. ا ق ش- تا كوكپاردان جارىس ءوتىپ جاتقانىن كوردىك. امەريكا كوكپارعا كىرىسىپ جاتسا، كوكپاردىڭ باعى جاناتىنىنا كۇمانىمىز جوق. كوكپار كورشى ەلدەردىڭ ءبىرازىنا ورتاق ۇلتتىق ويىن. قازاقتا ون بالاسى بار اتانىڭ بالالارىنىڭ ءبىرى «مىناۋ مەنىڭ عانا اكەم» دەگەن بالانى «اقىماق بالا» دەپ ايتادى. ءبىر اتانىڭ بالالارى ءۇيدىڭ وتاعاسىن «ءبارىمىزدىڭ اكەمىز» دەپ بىلەدى. سول سەكىلدى، سىزدەر ون ءبىرىنشى بالا بولىپ كەلىپ جاتساڭىزدار، قوش كەلدىڭىزدەر دەپ ايتامىز»، - دەدى بەكبولات تىلەۋحان.

بۇل سوزگە كوۆبويلار كومانداسىنىڭ كاپيتانى كريد گارنيك العىسىن ءبىلدىردى. «ەڭ كىشى ۇلى - كەنجەسى رەتىندە وتباسىعا قابىلداعاندارىڭىزعا راحمەت! كەنجە رەتىندە قاتارعا قوسقان ۇلكەن اعالارىمىز بىزگە قولداۋ بىلدىرەدى دەگەن سەنىمدەمىن. جىلقىعا دەگەن قۇرمەتپەن قارايتىن ەلگە كەلگەنىمىزگە قۋانىشتىمىز. مەنىمەن بىرگە ات ۇستىندە جۇرگەن كىل مىقتىلار كەلدى. ديپلوماتيالىق تۇرعىدا ەمەس، سپورتتىق جانە مادەني تۇرعىدا بايلانىستى كەڭەيتكىمىز كەلەدى»، - دەدى كريد گارنيك.

اۆتور: ايان بەكەن ۇلى