ءبىز قازاق حالقىن جۇرەكپەن تۇسىنەمىز - تۇركيا ءمينيسترى

استانا. قازاقپارات - بۇگىن تۇركيا- قازاقستان بيزنەس فورۋمىنىڭ اشىلۋ سالتاناتىندا ءسوز سويلەگەن تۇركيانىڭ ەكونوميكا ءمينيسترى نيحات زەيكبەدجي ءوز حالقىنىڭ ىستىق سالەمىن جەتكىزدى، دەپ حابارلايدى قازاقپارات ءتىلشىسى.

 «ءبىز اتا جۇرتىمىزعا كەلگەنىمىزگە وتە قۋانىشتىمىز. قازاقستان - اتا- بابالارىمىزدىڭ جەرى. بۇگىن ەكسپو كورمەسىندە تۇركيانىڭ ۇلتتىق كۇنى اتالىپ وتۋدە. ءبىزدىڭ دەلەگاتسيامىزدى وتە جاقسى قارسى الدى، ۇلتتىق كۇنىنە ارنالعان شارالار دا جوعارى دەڭگەيدە ۇيىمداستىرىلدى. ريزامىز! اتا جۇرتىمىزعا كەلىپ، تولقىپ وتىرمىز. بۇل جەردە ءوزىمىزدى ۇيدە جۇرگەندەي سەزىنەمىز. تاعى ءبىر اپتاداي جۇرسەك، قازاق تىلىندە ەركىن سويلەپ كەتەمىز. سەبەبى قازىردىڭ وزىندە ءبىر- ءبىرىمىزدىڭ ءتىلىمىزدى ءتۇسىنۋ قيىن ەمەس. ال، ەڭ باستىسى، ءبىز ءبىر- ءبىرىمىزدى جۇرەك ارقىلى تۇسىنەمىز. سەبەبى جۇرەكتىڭ ءتىلى ورتاق» ، - دەيدى زەيكبەدجي.

 ونىڭ ايتۋىنشا، قازىرگى ەكى جاقتىڭ ساۋدا- ەكونوميكالىق بايلانىستارى ويداعىداي دامىپ كەلەدى. الايدا ول بايلانىستاردى ءالى دە كۇشەيتۋگە بولادى. «شىنى كەرەك، ەكى جاقتى الىس- بەرىستىڭ باسىم بولىگى تابيعي رەسۋرستارعا تيەسىلى. بىزگە باسقا سالالاردا دا بايلانىستاردى دامىتۋ قاجەت. ساۋدا- ساتتىقتىڭ كولەمىن 5 ميلليارد دوللارعا جەتكىزۋ كەرەك. ەكى ەلدىڭ پرەزيدەنتتەرى وسىنداي مەجەنى بەلگىلەپ وتىر. نەگىزى، نازاربايەۆ پەن ەردوعان ءبىر- ءبىرىن دوس رەتىندە عانا ەمەس، باۋىر رەتىندە دە قاتتى سىيلايدى. كاسىپكەرلەر ءۇشىن وسىنداي تىعىز بايلانىستىڭ بولعانى ءتيىمدى. سەبەبى ساياسي قارىم- قاتىناس جاقسى بولسا، ەكونوميكالىق بايلانىستار دا جاقسى داميدى» ، - دەپ اتاپ كورسەتتى زەيكبەدجي مىرزا.

ايتا كەتەيىك، بۇگىن استاناداعى ەكسپو كورمەسىندە تۇركيا رەسپۋبليكاسىنىڭ ۇلتتىق كۇنى اتالىپ وتۋدە. وسىعان وراي، كورمە اياسىندا جانە ودان تىس جەردە سان الۋان مادەني- بۇقارالىق، ىسكەرلىك شارالار باستالىپ كەتتى.

 

اۆتور: ارمان اسقاروۆ