قازاقستاندا حالىقارالىق اسكەري ويىندار اياقتالدى
«2017-جىلعى حالىقارالىق اسكەري ويىندار اياقتالۋعا جاقىن قالدى. ءسوزسىز، بۇل ويىن الەمنىڭ ءارتۇرلى ەلدەرى اسكەرلەرىنىڭ تاريحىنا ايرىقشا ۇلەس قوستى. ويىنداردىڭ ارقاسىندا اسكەري جانە اسكەري-تەحنيكالىق ىنتىماقتاستىق قالىپتاسىپ قانا قويماي، اسكەري قىزمەتشىلەر مەن اسكەرلەر اراسىندا شىنايى دوستىق پايدا بولادى. سايىسقا قاتىسۋشىلاردىڭ بارلىعىنىڭ دا دايىندىقتارى مىقتى. جيىندا ءاربىر اسكەري قىزمەتشى ءوزىنىڭ كاسىبي ماشىعى مەن اسكەري شەبەرلىگىن كورسەتە الدى. سىزدەردى، ياعني، وسى سايىستىڭ جۇلدەگەرلەرى مەن جەڭىمپازدارىن قۇتتىقتايمىن»، - دەپ ويىنداردىڭ جابىلۋ راسىمىندە گەنەرال-پولكوۆنيك ساكەن جاسۇزاقوۆ.
حالىقارالىق اسكەري ويىندار - حالىقارالىق دەڭگەيدە جوعارى مارتەبەگە يە بولعان ىرگەلى شارالاردىڭ ءبىرى. ارحو-2017 شەڭبەرىندە بيىلعى جىلدىڭ تامىزدىڭ 1-9 ارالىعىندا قازاقستان رەسپۋبليكاسىنىڭ اۋماعىندا «ارتيللەريالىق وق اتۋ شەبەرلەرى»، «مەرگەن شەبى» جانە سايىستىڭ جاڭا ءتۇرى «ۇشقىشسىز ۇشۋ اپپاراتتارى ەسەپتوپتارىنىڭ سايىسى» اتتى ءىرى جارىستار ءوتتى.
«وتار» 40-شى اسكەري بازاسىنىڭ قازاقستاندىق پوليگونىندا بايقاۋلاردى وتكىزۋ ءۇشىن بارلىق قاجەتتى ينفراقۇرىلىم مەن شارتتار قاراستىرىلعان. ال «ءماتىبۇلاق» پوليگونىنىڭ اۋماعى «ۇۇا ەسەپتوپتارىنىڭ سايىسى» بايقاۋىن وتكىزۋ ءۇشىن جابدىقتالدى. سايىسقا قاتىسۋ ءۇشىن قازاقستانعا الەمنىڭ 18 ەلىنەن 400 گە جۋىق اسكەري قىزمەتشى كەلدى.
«مەرگەن شەبى» بايقاۋىنىڭ قورىتىندىسى بويىنشا قازاقستان قارۋلى كۇشتەرىنىڭ كومانداسى ءبىرىنشى ورىندى، رەسەي كومانداسى ەكىنشى ورىندى جانە بەلارۋس كومانداسى ءۇشىنشى ورىندى يەلەندى. كىشى سەرجانت نۇرسۇلتان باقتىوراز بايقاۋدىڭ ۇزدىك مەرگەنى اتانسا، كىشى سەرجانت ماقسات شىنالييەۆ پەن قازاقستاندىق اعا سەرجانت ەرعانات قۇدابەكوۆ ۇزدىك مەرگەن جۇبى اتاندى. «ارتيللەريالىق وق اتۋ شەبەرلەرى» بايقاۋىنىڭ قورىتىندىسى بويىنشا قازاقستان رەسپۋبليكاسى ءبىرىنشى ورىندى ەنشىلەسە، بەلارۋس رەسپۋبليكاسى ەكىنشى ورىندى جانە رەسەي فەدەراتسياسى ءۇشىنشى ورىندى جەڭىپ الدى.
رەسەيلىك سەرجانت رۋستام چيكتايەۆ ۇزدىك مەحانيك- جۇرگىزۋشى اتانسا، بەلارۋستان كەلگەن ەفرەيتور يۆان شۆايا ۇزدىك كوزدەۋشى، ءازىربايجاننان كەلگەن كىشى سەرجانت ەلشات ورۋدجوۆ ۇزدىك ەسەپتوپ كومانديرى اتاندى. قازاقستاندىق سەرجانت مەيىرحان ابىلدايەۆتىڭ جەتەكشىلىگىمەن مينااتقىش ەسەپتوبى ۇزدىك بولىپ تانىلدى.
«ۇشقىشسىز ۇشۋ اپپاراتتارى ەسەپتوپتارىنىڭ سايىسى» بايقاۋىنىڭ قورىتىندىسى بويىنشا قازاقستان ءبىرىنشى، رەسەي ەكىنشى جانە يران ءۇشىنشى ورىنعا جايعاستى. يراندىق مايور دجافاريان حاميد ۇۇا ۇزدىك تەحنيگى، ال رەسەيدىڭ اعا لەيتەنانتى ۆلاديمير زاينچكوۆسكي ۇ ۇ ا ۇزدىك وپەراتورى اتاندى. كەرنەيدىڭ اۋەزدى ۇنىمەن جۇرگىزۋشىلەر كوماندالاردى ساحناعا شاقىرىپ، جەڭىمپازدارعا قۇرمەت كورسەتتى.
جەڭىمپازدار كۋبوكتارمەن، مەدالدارمەن، ديپلومدار جانە باعالى سىيلىقتارمەن ماراپاتتالدى. ءراسىم سوڭىندا ويىن قاتىسۋشىلارىنىڭ نازارىنا مەرەكەلىك كونسەرت ۇسىنىلدى.
