ەلباسىنىڭ تاريحي ماقالاسى عاسىر سۇراقتارىنا جۇيەلى جاۋاپ بەرەدى
«بۇگىن ءبىز وتە ماڭىزدى ماسەلەنى تالقىلاماقپىز. ەلباسىمىز نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسى قالىڭ جۇرتشىلىقتىڭ ەرەكشە ىقىلاسىنا بولەنىپ، قازاقستاندىقتاردىڭ كەڭ قولداۋىن تابۋدا.
فۋتۋرولگتار سوڭعى ۋاقىتتا عىلىم مەن ءبىلىمنىڭ قارىشتاپ دامىپ، جاڭا ساپاعا كوشۋىن، كوممۋنيكاتسيالاردىڭ جەتىلۋىن، جاھاندىق سىن-قاتەرلەر، ونىڭ ىشىندە ترانسشەكارالىق تەرروريزم، ازىق-تۇلىك قاۋىپسىزدىگى، ميگراتسيالىق تولقىندار، الەمدەگى گەوساياسي تەكەتىرەستەر، عالامدىق جىلىنۋ، وركەنيەتتەر اراسىنداعى تايتالاس، ءۇشىنشى يندۋستريالىق جاڭعىرۋدىڭ جاڭا سيپاتتا ءورىس الۋىن ءجيى ايتۋدا. ءبىر جاعىنان - دامۋدىڭ جوعارى دەڭگەيىندەگى ەلدەردەگى ءىرى گەوەكونوميكالىق، گەوساياسي قۇبىلىستار مەن مونوپوليالار، ەكىنشى جاعىنان - الەم كارتاسىنان ءوز ورنىن، ءجونىن انىقتاپ، لايىقتى مارتەبە الۋعا ۇمتىلعان دامۋشى مەملەكەتتەر. جاھانداعى باسەكە، نارىققا قابىلەتتىلىك، العا وزعان تەحنولوگيالار، اقپاراتتار تاسقىنى، جاھاندانۋ ۇردىستەرى، زامانا تالاپتارى مەن تالقىسى، مىنە، وسى سەكىلدى كۇنتارتىبىندە تۇرعان وزەكتى، كوكەيكەستى ماسەلەلەرگە قانشالىقتى ءمان بەرىلۋدە؟ ول ءۇشىن مەملەكەت ۇلت بولىپ قانداي باسىمدىقتار، باستامالاردى قولعا الۋى كەرەك؟»، - دەدى ول وتىرىستى اشا كەلە.
وسى رەتتە امانشايەۆ ەلباسىنىڭ تاريحي ماقالاسى وسىنداي عاسىر سۇراقتارىنا جۇيەلى جاۋاپ بەرىپ، ماڭگىلىك ەل بولۋعا مۇراتتالعان قازاقستاننىڭ رۋحاني سالادا الداعى دامۋىنىڭ نەگىزگى باعىتتارىن تايعا تاڭبا باسقانداي انىق، تەرەڭ ايقىنداپ بەرگەنىن باسا ايتتى.
«ەندىگى ءبىزدىڭ ماقساتىمىز - ۇلت كوشباسشىسى ايقىنداپ بەرگەن وسى كونتسەپتۋالدى ۇستانىمداردى، كەشەندى باعدارلامانى قوعام بولىپ جۇمىلىپ، تولىق، مازمۇندى، كرەاتيۆتى تۇردە جۇزەگە اسىرۋ. بۇگىندە ەل كولەمىندە قىرۋار جۇمىس اتقارىلىپ جاتىر. بۇكىل مەملەكەتتىك جانە ازاماتتىق قوعام ينستيتۋتتارى اتالعان باعىتتا جۇمىلىپ ەڭبەك ەتۋدە»، - دەدى ەلوردا اكىمىنىڭ ورىنباسارى.
اۆتور: مارلان جيەمباي
