19:36, 04 - تامىز 2017 | GMT +6
مىسىردا تۇتقىندالعان قازاقستاندىق التى ازامات ەلگە ورالدى - فوتو
استانا. قازاقپارات - ق ر سىرتقى ىستەر مينيسترلىگىنىڭ باسپا ءسوز قىزمەتىنىڭ جەتەكشىسى ءانۋار جايناقوۆ فەيسبۋكتەگى پاراقشاسىندا مىسىردا تۇتقىندالعان قازاقستاندىق التى ازاماتتىڭ ەلگە ورالعانىن ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«ەلىمىزدىڭ بارلىق التى ازاماتى بۇگىن مىسىردان ءوز ەلىنە امان-ەسەن ورالدى. قازىر ولار ءوز ۇيلەرىنە تۋىستارى مەن جاقىندارىنا بارا جاتىر»، - دەپ جازدى ءانۋار جايناقوۆ.
ەسكە سالا كەتسەك، وسىعان دەيىن مىسىردا 6 ستۋدەنتتىڭ جوعالىپ كەتكەندىگى تۋرالى اقپارات جاريالانىپ، كەيىنىرەك ستۋدەنتتەردىڭ مىسىردىڭ قۇقىق قورعاۋ ورگانىندا بولعاندىعى انىقتالعان بولاتىن.
وسىعان بايلانىستى قازاقستان مىسىرعا رەسمي نارازىلىق نوتاسىن جىبەرگەن. 1 -تامىزدا مىسىردىڭ ۇلتتىق قاۋىپسىزدىك قىزمەتى قازاقستان ەلشىلىگىمەن حابارلاسىپ، التى ازاماتتىڭ ەلىنە قايتارىلاتىنىن حابارلاعان. قازاقستاندىق التى ازاماتتىڭ ول جاقتا نە ءۇشىن ۇستالعانى ءالى بەلگىسىز بولىپ وتىر.
اۆتور: ايان بەكەن ۇلى
