نۇرلان ەرمەكبايەۆ ەگيپەتتە ۇستالعان ستۋدەنتتەرگە قاتىستى پىكىر ءبىلدىردى

استانا. قازاقپارات - ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءدىني ءبىلىم الۋ ءۇشىن رەسمي جولداماسىز شەتەلگە اتتانباۋعا كەڭەس بەردى، دەپ حابارلايدى «قازاقپارات» ح ا ا ءتىلشىسى.

«ەگيپەتتەگى قازاقستاندىق ستۋدەنتتەردىڭ كەلەڭسىز وقيعاسى وڭىنان شەشىلدى، ءبىز وعان قۋانىشتىمىز. سوڭعى كەزدەرى جاستاردىڭ ەشقانداي رەسمي جولداماسىز كۋرستارعا وقۋعا بارىپ، كەلەڭسىزدىكتەرگە تاپ بولۋى جيىلەپ كەتتى. سوندىقتان، قازاقستان مۇسىلماندارى ءدىني باسقارماسىمەن بىرلەسىپ، ءدىني ءبىلىم الۋ ءۇشىن شەت مەملەكەتتەرگە ءوز بەتىمەن بارماۋعا كەڭەس بەرەمىز»، - دەدى ن. ەرمەكبايەۆ.

 سونىمەن بىرگە، مينيستر شەتتە العان ءدىني ءبىلىمنىڭ قازاقستاندا جاراماي قالۋى ىقتيمالدىعىن جانە شەتەلگە ءبىلىم الۋعا كەتكەن جاستاردىڭ ۇلكەن قاتەرگە باس تىگىپ وتىرعاندارىن باسا ايتتى.

«ق م د ب قاتىسۋىنسىز العان ءدىني بىلىممەن ۇمىتكەرلەر ق م د ب جۇيەسىنە جۇمىسقا ورنالاسا المايدى. وزدەرى ءۇشىن ءبىلىم الۋعا باراتىن ادامدار قانداي قاتەرگە باس تىگىپ وتىرعاندارىن ءتۇسىنۋى قاجەت. بۇل ماسەلە ءدىني ءبىلىم الاتىندارعا عانا قاتىستى ەمەس. بۇگىندە مىڭداعان قازاقستاندىق ستۋدەنتتەر شەت مەملەكەتتەردە ءتۇرلى ماماندىقتار بويىنشا ءبىلىم الۋدا. ولار دا قىلمىستىق توپتاردىڭ، ءدىني راديكالداردىڭ قۇربانىنا اينالۋى مۇمكىن. بۇل بارىمىزگە ورتاق پروبلەما»، - دەپ تولىقتىردى مينيستر.

مينيسترلىك ۇسىنعان دەرەكتەرگە سايكەس، قازىرگى ۋاقىتتا 300-گە جۋىق قازاقستاندىق وزگە مەملەكەتتەردە ءدىني ءبىلىم الىپ جاتىر. ولاردىڭ ءبىر بولىگى ق م د ب جولداماسىمەن كەتكەن. ەسكە سالا كەتسەك، 20 - شىلدەگە قاراعان ءتۇنى ەگيپەتتىڭ ارنايى قىزمەتى ءتىل كۋرسىنا كەتكەن 6 قازاقستاندىق ستۋدەنتتى ۇستادى. 1 - تامىز كۇنى كەشكىسىن ەگيپەتتىڭ ۇلتتىق قاۋىپسىزدىك كوميتەتىنىڭ وكىلدەرى قازاقستاننىڭ ەلشىلىگىمەن حابارلاسىپ، وسىعان دەيىن ۇستالعان قازاقستاندىق ازاماتتاردىڭ بارلىعىن ەلىنە دەپورتاتسيالايتىندارىن حابارلادى. قازاقستاندىقتاردى ۇستاۋ سەبەپتەرى ازىرگە بەلگىسىز.

 اۆتور: ايجان سەرىكجان قىزى