قىتاي - ورتالىق ازيا فورۋمىندا ق ر مەن ق ح ر ىنتىماقتاستىعىنا ۇلگىلى دەگەن باعا بەرىلدى
شاراعا قىتاي حالىقتىق ساياسي كونسۋلتاتيۆتىك كەڭەسىنىڭ بۇكىل قىتايلىق كوميتەت ءتوراعاسىنىڭ ورىنباسارى، بۇكىل قىتايلىق ونەركاسىپ جانە ساۋدا قاۋىمداستىعىنىڭ ءتوراعاسى ۆان تسينمين، وزبەكستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اچيلباي راماتوۆ، تاجىكستان رەسپۋبليكاسى پرەمەر-ءمينيسترىنىڭ ورىنباسارى ازيم يبروحيم، قىرعىز رەسپۋبليكاسى كولىك جانە جول ءمينيسترىنىڭ ورىنباسارى ازيمكان جۋسۋباليەۆ، قىتايداعى تۇرىكمەنستان ەلشىسى چينار رۋستاموۆا، تسزيانسۋ پروۆينتسياسىنىڭ گۋبەرناتورى ۋ چجەنلۋن، ق ح ر سىرتقى ىستەر ءمينيسترىنىڭ كومەكشىسى (ءمينيستردىڭ ورىنباسارى شەنىندەگى) لي حۋەيلاي، ق ح ر مەن ورتالىق ازيانىڭ عىلىمي جانە ىسكەرلىك سالاسىنداعى وكىلدەرى قاتىستى.
قازاقستاندىق دەلەگاتسيانى قىتايداعى قازاقستاننىڭ ەلشىسى شاحرات نۇرىشەۆ باستاپ باردى. ءوز كەزەگىندە ول قازىرگى ۋاقىتتا ليانيۋنگان پورتىنداعى قازاقستاندىق-قىتايلىق تەرمينال ەڭ ماڭىزدى ستراتەگيالىق توراپتاردىڭ ءبىرى ەكەنىن اتاپ ءوتتى.
بۇل ترانزيت قازاقستاننىڭ ترانزيتتىك-كولىكتىك الەۋەتىن ارتتىرىپ، ازيا - تىنىق مۇحيتى ايماعىنىڭ نارىعىندا قازاقستاندىق ەكسپورتتىڭ باعدارىن قالىپتاستىرادى.
شاحرات نۇرىشەۆ ءوز سوزىندە 2020-جىلعا قاراي ليانيۋنگان قازاقستاندىق-قىتايلىق تەرمينالىنا 500 مىڭ جيىرمافۋتتىق ەكۆيۆالەنت (TEU) مولشەرىندە كونتەينەرلىك جۇك اكەلۋ جوسپارلانىپ وتىرعانىن حابارلادى.
«الداعى جىلدارى قازاقستان اۋماعى ارقىلى سانكت- پەتەربۋرگ پەن ليانيۋنگان قالاسىن، «قىتاي - قازاقستان - رەسەي - ەۋروپا»، «قىتاي - قازاقستان - تۇرىكمەنستان - يران» جانە «قىتاي - قازاقستان - ورتالىق ازيا» تەمىر جولدارىن بايلانىستىراتىن «باتىس ەۋروپا - باتىس قىتاي» حالىقارالىق اۆتوكولىكتىك ءدالىزى جىبەك جولىنىڭ ەڭ ماڭىزدى مارشرۋتىنا اينالىپ، ايماقتاعى كورشىلەردىڭ ورتاق قولدانىسىنا پايدالانىلاتىن بولادى»، - دەيدى قازاقستاندىق ديپلومات.
بۇكىل قىتايلىق ونەركاسىپ جانە ساۋدا قاۋىمداستىعىنىڭ ءتوراعاسى ۆان تسينمين قازاقستان مەن قىتاي اراسىنداعى قارىم-قاتىناستى مەملەكەتارالىق ءوزارا سەرىكتەستىكتىڭ جارقىن ۇلگىسى دەپ اتادى. ول يندۋستريالاندىرۋ جانە ينۆەستيتسيا سالاسىندا قۇنى 28 ميلليارد دوللارلىق 51 جوبانىڭ ىسكە اسىرىلۋى تۋرالى ەسكە سالىپ، ليانيۋنگان پورتىنداعى قازاقستاندىق-قىتايلىق لوگيستيكالىق تەرمينالدىڭ ماڭىزدىلىعىن اتاپ ءوتتى.
فورۋم اياسىندا ليانيۋنگان قالاسىنىڭ ساۋدا-ەكونوميكالىق جانە تۋريستىك الەۋەتى تانىستىرىلدى.
اۋدارما: ايان بەكەن ۇلى
