قازاق قىزدارىن اسىراپ العان امەريكالىقتار استانادا تۇرادى - فوتو
«بۇل فيلمدى الماتىداعى ا ق ش باس كونسۋلدىعىنىڭ «قازاقستانداعى امەريكالىقتار» جوباسى اياسىندا تۇسىردىك. فيلمگە كەيىپكەرلەر ىزدەگەن كەزدە نازاربايەۆ ۋنيۆەرسيتەتىندە كەي ستايس دەگەن مۇعالىمنىڭ بار ەكەندىگىن، وتباسىمەن كەلگەندىگىن ايتتى. ودان كەيىن ونىڭ استانادا جۇبايىمەن جانە 2000 -جىلداردىڭ باسىندا تارازدان اسىراپ العان ەكى قىزىمەن تۇراتىندىعى بەلگىلى بولدى. قازاقستاننان اسىراپ الىنعان بالالاردىڭ امەريكادان وتانىنا ورالۋى وتە سيرەك كەزدەسەتىن جايت. سوندىقتان مەن ولار تۋرالى شاعىن كارتينا تۇسىرۋگە شەشىم قابىلدادىم»، - دەدى قانات بەيسەكەيەۆ.
ونىڭ ايتۋىنشا، امەريكالىق وتباسىنىڭ قازاقستانعا كەلگەنىنە 2 جىل بولعان.
«قىزدار استاناداعى ينتەرناتسيونالدى مەكتەپتە وقيدى. فيلمدى وتكەن جىلدىڭ كۇزىندە تۇسىرە باستاعان ەدىم، ال ەكسپو اۋماعىنداعى كورىنىستى تاياۋدا ءتۇسىرىپ، اياقتادىم»، - دەدى رەجيسسەر.
ستايستار كوپ بالالى وتباسى، ولاردىڭ 7 بالاسى بار. ونىڭ 4-ەۋى ءوز كىندىكتەرىنەن تاراسا، بەسىنشى قىز بالانى قىتايدان، تاعى ەكى قىزدى تارازدان اسىراپ العان. ولار ينتەرناتسيونالدى وتباسى، 9-10 تىلدە سويلەيدى. 70- جىلدارى رامونا ستايس گونكونگتا ەرىكتى بولىپ جۇمىس ىستەپ، ازياعا كوپ ساياحات جاساعان. رامونا مەن كەي گونكونگتە جۇرگەن كەزدەرىندە 4,5 جاستاعى قىزدى اسىراپ الماق بولىپ، ءبىرقاتار ەلدى قاراستىرعان.
«قانداي دا ءبىر سەبەپتەرمەن ايەلىمنىڭ نازارى قازاقستانعا اۋدى. مۇمكىن وتباسىلىق ءداستۇر مەن جوعارى ادامگەرشىلىك قاسيەتتەرگە بايلانىستى شىعار»، - دەدى رامونا فيلمدە. قىزدارعا تاراز جانە كاميلا دەگەن ات بەرىلگەن.
«ءبىز قىزدارىمىزدىڭ شىققان تەكتەرى، تۋعان قالالارى ەستەرىندە بولۋىن قالادىق. سوندىقتان قىزدارىمىزدىڭ بىرىنە تاراز- اينا دەگەن ات بەردىك. كاميلا اتىن تاڭداعانعا دەيىن ءبىراز ەسىمدى قاراپ شىقتىق»، - دەدى قىزداردىڭ اناسى رامونا كەي ستايس قىزدارى ءۇشىن قازاقستانعا كەلۋدىڭ بارلىق مۇمكىندىكتەرىن ىزدەگەن.
قازاقستاندا جۇمىس ىستەۋ مۇمكىندىگى پايدا بولعاندا ايەلىمەن بىرگە ەش ويلانباستان استاناعا كەلگەن. قىزدار قازاق جانە ورىس تىلدەرىن ۇيرەنىپ ءجۇر جانە بولاشاقتا قازاق- امەريكالىق ستيلدە تۇرمىسقا شىققىلارى كەلەدى. ويتكەنى ولارعا قازاقتىڭ ۇلتتىق كيىمدەرى مەن ءداستۇرى، مادەنيەتى قاتتى ۇنايدى.
اۆتور: مارلان جيەمباي
