رەسەيدىڭ سوڭعى يمپەريا رەتىندە ءومىر ءسۇرۋىن توقتاتاتىن كەزگە كۋا بولامىز - مارات توقاشبايەۆ

استانا. قازاقپارات - سونىمەن كەشە دونالد ترامپ رەسەيگە قارسى سانكسيالاردى كۇشەيتەتىن زاڭعا قول قويىپتى!

الدىندا عانا ا ق ش كونگرەسىنىڭ وكىلدەر پالاتاسى ءۇش داۋىس قارسى بولىپ، 419 داۋىس قولداپ وتكىزگەن جوبا پرەزيدەنتتىڭ قول قويۋىنا جىبەرىلگەندە ورىستار «ترامپ بۇل زاڭ جوباسىنا قول قويمايتىن شىعار» دەپ قاتتى ۇمىتتەنگەن. ول بولسا ويلانىپ، تولعانىپ باس قاتىرعان جوق. سيگناتۋراسىن سۇيكەدى دە سالدى. ءسويتىپ رەسەي فەدەراتسياسىن يران مەن ك ح د ر قاتارىنا اپارىپ قوياتىن قاتاڭ زاڭ ماسكەۋ ءۇشىن يادرولىق سوققىدان كەم بولعان جوق. گريگوري ياۆلينسكي مۇنى «پۋتين مەن لاۆروۆتىڭ بۇكىل سىرتقى ساياساتىنىڭ كۇيرەۋى» دەپ وتىر.

قازىر رەسەي اينالاسىنداعى كۇللى كورشىلەرىمەن قىرعيقاباق جاعدايدا. بالتىق جاعالاۋى ەلدەرى باياعىدا-اق تەرىس اينالىپ كەتكەن. ۋكراينامەن سوعىس ءجۇرىپ جاتىر. مولدوۆامەن، گۇرجىستانمەن ەگەس تاۋسىلار ەمەس. بەلورۋسپەن ءتىل تابىسۋ قيىنداعان. موماقان قازاقستان ەشتەمە شەشە المايدى. ورتالىق ازيا ەلدەرىمەن بايلانىس اۋعانستاننان تونگەن قاۋىپتى سەيىلتۋگە جاراسا سونىڭ ءوزى قۇبا قۇپ.

رەسەيدىڭ اينالاسىندا سەنەتىن كۇشتى دوسى جوق. قىتاي كومەك قولىن سوزباسى انىق. ە و ءۇشىن رەسەيدەن گورى ا ق ش ماڭىزدى سەرىكتەس. ال ا ق ش- تىڭ جاڭا زاڭى ونداعان جىلدارعا سوزىلاتىن قىل بۇراۋ. كەڭەس وداعىنا سالىنعان سانكسيا 38 جىلدان سوڭ ازەر الىنعانىن ۇمىتپايىق. رەسەيدىڭ ا ق ش- قا قارسى سالامىز دەگەن سانكسيالارى تۇككە تۇرمايتىن بالانىڭ ويىنىنداي نارسە. رەسەي ۇلى دەرجاۆالىق امبيتسياسى مەن اسىرەۇلتشىل شوۆينيزمى سالدارىنان اينالاسىنا شىنايى دوس جينايتىن مۇمكىندىكتەن ايىرىلىپ قالدى. رەسەي سولتۇستىك كورەيا سياقتى ءبارى تۇكىرەتىن جيىركەنىشتى ەلگە اينالدى.

جاعدايدى قالاي تۇزەۋگە بولادى؟ ياۆلينسكيدىڭ ۇسىنىسى: قىرىم تۇبەگىنىڭ حالىقارالىق- قۇقىقتىق جاعدايىن انىقتاۋ ءۇشىن حالىقارالىق كونفەرەنسيا ۇيىمداستىرۋ قاجەت ءارى لەگيتيمدى رەفەرەندۋم وتكىزۋ ماڭىزدى. ەكىنشىدەن، دونباستا سوعىسىپ جاتقان اسكەرىن كەرى شاقىرىپ، ۋكراينامەن شەكاراسىن بەكىتىپ، شيەلەنىس نۇكتەسىنە قارۋ-جاراق پەن اسكەري تەحنيكا جەتكىزۋدى توقتاتقانى ءجون. ۇشىنشىدەن، رەسەيدىڭ سيرياداعى ازامات سوعىسىنا قاتىسۋىن دوعارۋى قاجەت.

ەگەر وسى ءۇش قادام جاسالماسا، رەسەيدىڭ سوڭعى يمپەريا رەتىندە ءومىر ءسۇرۋىن توقتاتاتىن كەزگە كۋا بولارىمىز انىق.

جۋرناليست مارات توقاشبايەۆ Facebook-تەگى پاراقشاسىنان