قازاقستاندى شەتەلدىك برەندتەردى جامىلعان رەسەيلىك تاۋارلار جاۋلاپ الدى

استانا. قازاقپارات - بۇگىندە نارىقتىق ەكونوميكا زاڭدارى ەسكىردى. الەمدە كوگنيتيۆتى (تانىمدىق تانىپ بىلۋگە قاتىستى) ەكونوميكاعا نەگىزى باسىمدىق بەرىلەدى.

وندايدا ادامنىڭ پسيحولوگياسىنا اسەر ەتۋ ارقىلى تاۋار مەن قىزمەتتەر ساتىلادى. ەكسپورتتىق ساياساتتا ءدال وسى كوگنيتيۆتى ەكونوميكاعا باسىمدىق بەرگەن ءجون، دەپ حابارلايدى قازاقپارات ءتىلشىسى.

«قازاقستاننىڭ مەملەكەتتىك- جەكەشەلىك سەرىكتەستىك ورتالىعى» ا ق باسقارما ءتوراعاسى ازامات ويناروۆتىڭ ايتۋىنشا، قازىرگى كەزدە رەسەيلىك كاسىپكەرلەر كوگنيتيۆتى ەكونوميكا نەگىزدەرىن ابدەن مەڭگەرىپ العان.

ولار شەتەلدىك برەندتەردىڭ تۇتىنۋشىنىڭ قالاۋىنا قاتتى اسەر ەتەتىنىن جاقسى بىلەدى. سوندىقتان ءوز تاۋارلارىن ءدال سول برەندتەردىڭ اتىمەن ساتىپ جاتىر.

«ماسەلەن، Faberlic, Borg Elenberg, Pozalini, Carnaby جانە تاعى كوپتەگەن برەندتەر شەتەلدىك تاۋارلار بولىپ كورىنسە دە، بارلىعى تازا - رەسەيلىك تاۋارلار. كورشى ەلدىڭ كاسىپكەرلەرى تۇتىنۋشىنىڭ نەمىستىڭ ساپاسىنا سەنەتىنىن جاقسى بىلەدى. سول سەبەپتى تەحنيكانى Borg پەن Elenberg تىڭ ماركاسىمەن ساتادى. كيىم جاعىنان يتالياندىقتاردىڭ دا وق بويى وزىق كەلە جاتقانى بەلگىلى. سوندىقتان Pozalini دىڭ برەندى ءوتىمدى ەكەنىن ابدەن ءبىلىپ العان. ەندى، بۇرىن ەۋروپانىڭ ءاربىر مەملەكەتى ءوز برەندىن قالىپتاستىرۋعا تىرىستى. سول ارقىلى وزىنە يميدج جاساپ الدى. ەندى، رەسەيلىك كاسىپكەرلەر سونىڭ بارلىعىن ءوز پايداسىنا ىسكە اسىرۋدى مەڭگەرىپ الدى»، - دەدى ويناروۆ بۇگىن ەكسپورتتى دامىتۋعا ارنالعان جيىندا.

ونىڭ ايتۋىنشا، اتالعان برەندتەردى قۇرعان كەزدە ءوندىرىس وشاقتارىنىڭ بارلىعى قىتايدا بولعان. قازىر ءبارىن رەسەيگە كوشىرىپ الدى. «بىز ءوزىمىزدىڭ ساۋدا ورتالىقتارىمىزدى ارالاپ شىقتىق. سوندا بارلىعىنا رەسەيلىك برەندتەردىڭ كىرىپ العانىن بايقادىق. Sela - رەسەيلىك برەند، INCITY - رەسەيلىك برەند، Kanzler - رەسەيلىك برەندەر. ونداي بۋتيكتەر كوپ. قازاقستان دا ءوز تاۋارلارىن ەكسپورتقا شىعارعاندا كوگنيتيۆتى ەكونوميكانى جان-جاقتى قولدانۋى قاجەت»، - دەپ اتاپ كورسەتتى ورتالىق باسشىسى.