الماتىنىڭ تاۋ لاندشافتىسى بەيجىڭدەگىدەن ادەمى - بين ۆۋ
الماتىعا قىتايلىق شاڭعىشىلاردى كوبىرەك تارتۋ جاعىن ۇيىمداستىرۋعا بولادى، دەدى بۇگىن الماتىدا ءوتىپ جاتقان تاۋ- شاڭعى سپورتى بويىنشا حالىقارالىق فورۋمدا قىسقى سپورت تۇرلەرى بويىنشا قىتاي قاۋىمداستىعىنىڭ باس مەنەدجەرى، «Beijing Wanda Culture Industry Group» كومپانياسىنىڭ باس ديرەكتورىنىڭ ورىنباسارى بين ۆۋ.
«ءبىز كەشە الاتاۋدى تىكۇشاقپەن ارالاپ شىقتىق. وتە ادەمى. سىزدەردىڭ تاۋ لاندشافتارىڭىز تاماشا، بولاشاعى زور، ول ءبىزدىڭ بەيجىڭدەگىدەن ادەمى. تابيعي شاتقالدار كوزتارتادى. سىزدەرگە تاۋ سپورتىن ناسيحاتتايتىن جارنامانى كۇشەيتۋ كەرەك»، - دەدى قىتايلىق بين ۆۋ. ول تاۋ- شاڭعى سپورتى بويىنشا قازاقستانمەن قارىم- قاتىناستى بارىنشا كۇشەيتۋگە ىنتالى ەكەنىن ايتتى.
«الماتىعا قىتايلىق شاڭعىشىلاردى كوبىرەك تارتۋ جاعىن ۇيىمداستىرۋعا بولادى. الماتى تاۋلارىن ناسيحاتتايتىن جارنامالار كوبىرەك كەرەك. قالانىڭ تاۋ- شاڭعى سپورتىن دامىتۋ بويىنشا حالىقارالىق ورتالىق قىلۋعا بولادى. ويتكەنى الماتى تاۋلارى وتە ادەمى. قىتايمەن قازاقستاندى سالىستىرۋعا كەلمەيدى، ءبىزدىڭ ىشكى نارىعىمىزدا تۇتىنۋشى كوپ. دەگەنمەن، سىزدەر بارىنشا ۇسىنىس جاساسىڭىزدار تۇتىنۋشى تارتىلادى»، - دەدى قىتايلىق ساراپشى.
ايتا كەتەيىك، بۇگىن الماتىدا تاۋ ءتۋريزمىن دامىتۋعا ارنالعان «International Mountain Sports Festival» فەستيۆالى اياسىندا حالىقارالىق فورۋم ءوتتى.
جيىندى رەسمي اشقان قالا اكىمىنىڭ ورىنباسارى ارمان قىرىقبايەۆ الماتى قازاقستان عانا ەمەس، ورتالىق ازيا بويىنشا تاۋ- شاڭعى سپورتىنىڭ ورتالىعى بولۋعا ىنتالى ەكەنىن ايتتى. ارمان قىرىقبايەۆ 2017 -جىلدىڭ ءبىرىنشى توقسانىندا مەگاپوليسكە سىرتتان 200 مىڭنان استام ادامنىڭ كەلگەنىن، وتكەن جىلمەن سالىستىرعاندا قوناقتار سانى %18 عا ارتقانىن، سونىڭ ىشىندە %24 دان كوبى شەتەلدىك مەيماندار ەكەنىن ايتتى. قوناقۇيلەردە كورسەتىلەتىن قىزمەت ءتۇرى %18 عا ۇلعايىپ، 20 ميلليارد تەڭگەنى قۇراعان.
اۆتور: الماس مۇقاش ۇلى
