ايگىلى گولليۆۋد اكتەرى دجوك مالكوۆيچ ومىرلىك ۇستانىمدارىمەن ءبولىستى

 استانا. قازاقپارات - «تىنىم تاپپاڭىزدار»! «ومىرلىك ۇستانىمىڭىز قانداي؟» دەگەن سۇراققا استاناداعى قازاق ۇلتتىق ونەر ۋنيۆەرسيتەتىندە باسپا ءسوز ءماسليحاتىن وتكىزگەن گولليۆۋد اكتەرى وسىلاي دەپ جاۋاپ بەردى،

دەپ حابارلايدى «قازاقپارات» ح ا ا ءتىلشىسى.

باسپاءسوز ءماسليحاتى بارىسىندا اكتەرعا كاسىبى مەن كينويندۋسترياعا قالاي كەلگەنى تۋرالى ءبىرشاما سۇراقتار قويىلدى. اكتەر كينو سالاسى قانشا تارتىمدى بولعانىمەن، جىلدار بويى تەاتردان دا قول ۇزبەپتى. «ەكسپو-2017» حالىقارالىق كورمەسىن كەشە تاماشالاعان ول قازاقستان مەن فرانسيا ەلدەرىنىڭ پاۆيلوندارىنا ارنايى باس سۇعىپ قايتقان. دجون مالكوۆيچ ءومىرىنىڭ ون جىلىن فرانسيادا وتكىزگەنىن ەسكەرسەك، وزىنە ىستىق ەكىنشى وتانى فرانسيا ەلىنىڭ پاۆيلونىن اكتەردىڭ تەكتەن- تەككە ىزدەمەگەنىن اڭعارۋعا بولادى.

تىلشىلەر قاۋىمىنىڭ ءبىرى وعان «ومىرلىك ۇستانىمىڭىز قانداي؟» دەپ سۇراق قويعاندا، اكتەر ازداپ توسىلىپ قالعانداي بولدى.

«بىرىنشىدەن، الەم قاتتى وزگەرىپ كەتتى. دامۋى جەدەل مىنا زاماندا قالاي اقىل ايتارىمدى بىلمەيمىن. مەن كينويندۋستريا سالاسىندا بىرەگەي قالىپتى احۋال تۋىنداي قالعان ۋاقىتتا ءوسىپ، كينو سالاسى وركەندەگەن مەملەكەتتە جەتىلدىم. ول كەزدە (ا ق ش- تا) كينويندۋستريا ءبىر ورىندا ەدى. قازىر ول كينولار الەمگە تاراپ كەتتى. سوندىقتان، اقىل- كەڭەس تۋرالى نە ايتامىن؟.. ءارتۇرلى نۇسقالاردى سارالاپ كورىڭىزدەر. جۇمىستى بارىنشا بەرىلىپ اتقارىڭىزدار. مۇمكىندىكتەرىڭىزدى شىڭداي بەرىڭىزدەر»، - دەيدى گولليۆۋد اكتەرى.

دجون مالكوۆيچ ادام جەتىستىككە جەتۋ ءۇشىن ەشقاشان توقتاماۋ كەرەكتىگىن ايتادى. بۇل قاعيداتىن ول ءوزىنىڭ ومىرلىك تاجىريبەسىمەن بايلانىستىردى.

«ادام توقتاماۋ كەرەك. جەتىستىك بولا ما، جوق پا - ول جاعى سونشاما ماڭىزدى ەمەس. باستىسى - ءوز- وزىڭىزگە ادال بولىڭىز. تاجىريبە بولىسەردە بارىنشا اشىق بولعانىڭىز ابزال. تاجىريبەنى ىزدەگەننەن تالماۋ كەرەك. مەن وسىنداي جولمەن جۇرەمىن. ءوزىم ەشقاشان ءبىر ورىندا تۇرمايمىن. ىلعي ىزدەنىستەمىن. ءوزىمدى رەجيسسەر، اكتەر، تەاتر اكتەرى، پروديۋسسەر رەتىندە سىناپ، ديزاين سالاسىمەن دە اينالىستىم. كلاسسيكالىق مۋزىكالاردى جازامىن. ەڭ باستىسى، تىنىم تاپپاڭىزدار»، - دەپ تۇيگەن اكتەر كوپشىلىكتىڭ قوشەمەتىنە بولەندى.

ەسكە سالا كەتسەك، تانىمال گولليۆۋد اكتەرى دجون مالكوۆيچ استاناعا كەشە ۇشىپ كەلگەن بولاتىن. «ەۋرازيا» حالىقارالىق كينوفەستيۆالىنىڭ قۇرمەتتى مەيمانى قازاقستاندى ارالاپ شىققىسى كەلەتىنىن ايتادى. بۇعان دەيىن استاناعا گولليۆۋدتىڭ وزگە دە جارقىن جۇلدىزدارى نيكولاس كەيدج مەن ەدريان بروۋدي كەلىپ كەتكەن ەدى.