قازاقستاندىقتار تۇرىكسوي كامەرالىق وركەسترى قۇرامىندا شەتەلگە گاسترولگە شىقتى

استانا. قازاقپارات - قۇرامىندا قازاقستاندىقتار دا بار تۇرىكسوي جاستار كامەرالىق وركەسترى بالقان ەلدەرىنە ءوزىنىڭ كونسەرتتىك تۋرنەسىن باستادى، دەپ حابارلادى قازاقپارات حالىقارالىق ۇيىمنىڭ باسپا ءسوز قىزمەتىنە سىلتەمە جاساپ.

ازەربايجان، قازاقستان، قىرعىزستان، تۇركىمەنستان، باشقۇرتستان (ر ف) جانە تاتارستان (ر ف) تۇركيا استاناسىندا ونكۇندىك دايىندىق كەزەڭىن وتكىزىپ، ماكەدونيا استاناسى سكوپەدە بالقاندىق تۋرنە العاشقى كونسەرتىن بەردى.

تۇرىكسوي باس حاتشىسى دۇيسەن قاسەيىنوۆ كونسەرتتى اشا وتىرىپ، تىڭداۋشىلاردىڭ نازارىن وركەستر ۇجىمىنىڭ بىرەگەيلىگىنە اۋداردى. «ءبىز تۇرىكسوي جاستار كامەرالىق وركەسترىن 2010 -جىلى قۇردىق. ماقساتىمىز الەمدىك قوعامداستىققا كلاسسيكالىق مۋزىكانىڭ امبەباپ ءتىلى ارقىلى تۇركىتىلدەس حالىقتاردىڭ مۋزىكالىق مادەنيەتىنىڭ الەۋەتىن كورسەتۋ. ءبىز مۋزىكانى ورتاق مادەنيەتىمىزدىڭ ەلشىسى ەتتىك. وركەستر مۋزىكانتتاردى تۇركى ەلدەرىنىڭ كونسەرۆاتوريالارىنان دارىندى ستۋدەنتتەر اراسىنان تاڭدايدى. بۇل جاس مۋزىكانتتار 50 دەن استام كونتسەرت بەرگەن. ەكى البوم جازدى. جەتى جىل تولعان وركەستر ءار ەلدەردە ءوتىپ جاتقان فەستيۆالدارعا قاتىسۋعا شاقىرتۋ الىپ جاتادى. تۇرىك الەمىنىڭ جاس مۋزىكانتتارى ءۇشىن تۇرىكسوي كاسىبي مانساپتىڭ ماڭىزدى باسپالداعىنا اينالدى»، - دەدى د. قاسەيىنوۆ.

تۇرىكسوي ەۋرازيا تۇركىتىلدەس حالىقتارى اراسىنداعى باۋىرلاس ءوزارا ءىس-قيمىلدى نىعايتۋ ماقساتىندا قۇرىلعان مادەنيەت پەن ونەردىڭ حالىقارالىق ۇيىمى، ونىڭ قىزمەتى وسكەلەڭ ۇرپاققا ورتاق ءتىل، مادەنيەت، ونەر، ءداستۇردى زەردەلەۋگە، ساقتاۋعا، كورسەتۋگە باعىتتالعان.