كيىز ءۇي تالاي شەتەلدىك ساۋلەتشىلەردى تاڭ قالدىرادى - شەبەر

شىمكەنت. قازاقپارات - وڭتۇستىك قازاقستان وبلىسى، بەسكەتىك ەلدى مەكەنىنىڭ تۇرعىنى كوپجان تورپيەۆ بەس جىلدان بەرى قازاقتىڭ قارا شاڭىراعى - كيىز ءۇي دايىنداۋمەن اينالىسادى. كاسىپكەر حالىقارالىق ەكسپو كورمەسىنىڭ وتۋىنە وراي جۇمىس قارقىنىن ارتتىرعان، دەپ حابارلايدى قازاقپارات ح ا ا ءتىلشىسى.

قازاقتىڭ قاسيەتتى كيىز ءۇيىن الەمگە پاش ەتۋ ماقتارالدىق كاسىپكەر كوپجان تورپيەۆتىڭ كوپ جىلدان بەرگى ارمانى. بۇگىندە ىسكەر ازامات اۋىلداعى شەبەرلەردىڭ توبىن قۇرىپ، قايتالانباس ورنەگى بار كيىز ءۇي جاساۋدا. ناتيجەسىندە كيەلى شاڭىراقتىڭ ۇلتتىق ناقىشىنا قاراي قازاقستاننىڭ تۇكپىر-تۇكپىرىنەن تاپسىرىستار تۇسە باستاعان.

اۋىل تۇرعىنى بۇل كاسىبىنەن كول- كوسىر پايدا تاپپاسا دا، جۇرتشىلىقتىڭ كيىز ۇيگە دەگەن قىزىعۋشىلىعىنىڭ ارتا تۇسكەنىنە قۋانىپ وتىر. «الدىمەن كيىز ءۇيدىڭ زاماناۋي بەزەندەندىرىلۋىنە دەن قويدىق. ساۋلەتتىك ءسانى كەلىسكەن اق كۇمبەزدى ۇيلەر بۇگىندە ءتۇرلى ويۋلارمەن كومكەرىلۋدە. اۋىل ىسمەرلەرى كيىز ءۇيدىڭ بايىرعى نۇسقاسىن ساقتاي وتىرىپ، ءسانى مەن ساپاسىنا ەرەكشە كوڭىل اۋدارادى. جالپى قازاقتىڭ كيىز ءۇيى - ەرەكشە گەومەتريالىق ەسەپپەن، اسقان تاپقىرلىقپەن جاسالىنادى. وسى ۋاقىتقا دەيىن جاساعان كيىز ۇيلەرىمىز تالاي شەتەلدىك ساۋلەتشىلەردى تاڭ قالدىردى»، - دەيدى كوپجان تورپيەۆ. كاسىپكەر بۇگىندە استانا تورىندە ءوتىپ جاتقان حالىقارالىق كورمەگە كەلگەن قوناقتار ماقتارالداعى بەسكەتىك اۋىلىنا ات باسىن بۇرىپ جاتسا دەيدى.

سەبەبى ولاردىڭ كوڭىلدەرىنەن شىعاتىن دۇنيەلەر مۇندا جەتەرلىك ەكەن. ۇلتتىق ونەردىڭ شىن جاناشىرى وسىلايشا تۋريستەردى مىرزاشولگە شاقىرادى.

اۆتور: اينۇر اقبايەۆا