قانات يسلام: كەي بوكسشىلار رينگكە شىقپاي تۇرىپ ۇتىلىپ قالادى
وتانداسىمىزدىڭ ايتۋىنشا، كوپ بوكسشىلار شارشى الاڭعا شىقپاي جاتىپ قارسىلاسىنان ەمەس، وزىنەن ۇتىلىپ قالادى. «QAZAQ» ونىڭ سەبەبىن دە ءتۇسىندىرىپ بەردى.
«كەي بوكسشىلار ۇلكەن جارىس الدىندا رينگكە شىقپاي تۇرىپ ۇتىلىپ قالادى. قارسىلاسىنان ەمەس، وزىنەن ۇتىلادى. نەگە؟ سەبەبى بوكستان بولەك باسقا نارسەلەرمەن باسىن اۋىرتقانى ءۇشىن. ءار بوكسشىنىڭ ءارتۇرلى ماقساتى بولۋى زاڭدى. ءبىراق، شىن سپورتشىدا چەمپيون بولۋدان باسقا ماقسات بولمايدى. وزگەنىڭ پىكىرى، بوكستى تۇسىنبەيتىن كەي ادامداردىڭ ويى تۋرالى ويلاعان، سونى ۋايىمداعان بوكسشى ەشقاشان بيىك دارەجەگە جەتپەيدى. سەبەبى ونىڭ ويى قارسىلاسىن جەڭىپ، چەمپيون بولۋ ەمەس، رينگ سىرتىنداعى ادامداردىڭ پىكىرىمەن كۇرەسۋ. سولارعا جاقسى كورىنۋ، سولاردىڭ جاقسى دەگەن سوزىنە راحاتتانۋ، جامان دەگەن سوزىنە اۋرۋ. مۇنداي پىكىردەگى سپورتشى ۇزاققا بارمايدى. ولار رينگكە شىقسا دا قارسىلاسىن ەمەس، سىرت كوزگە قالاي كورىنىپ تۇرمىن دەپ ويلايدى. مۇندايلار بوكسشى ەمەس، ارتىستەر. ولارعا تەز سپورتتى قويىپ تەاترعا بارۋ كەرەك. نەمەسە كينوعا ءتۇسىپ باعىن سىناۋ قاجەت. مۇمكىن سول سالادا باعى جانار. ال، بوكستا ولار چەمپيون بولا المايدى. سەبەبى ماقساتى بولەك. بوكسشى جاتسا دا تۇرسا دا تەك دايىندىعىن ويلاپ، قارسىلاسىنا قولدانار تاكتيكانى ويىندا ءپىسىرۋ كەرەك. زالدا قايتالاۋ كەرەك. رينگتە سونى ىستەۋ كەرەك. ءوز كەمشىلىگىن تۇزەپ، ارتىقشىلىعىن ارتتىرۋى شارت. دۇرىس تاماقتانىپ، دۇرىس دەمالۋى قاجەت. سوندا عانا بەلەس باعىندىرادى. رينگتە وزگەنىڭ جاقسى پىكىرى، ماقتاۋى، داتتاۋى مەن سىناۋى، جىميىپ تۇسكەن سۋرەتىڭ مەن ۇيىڭدەگى بەلبەۋلەر كومەك بەرمەيدى. ولار سوققىڭدى اۋىرلاتىپ، جىلدامدىعىڭدى ارتتىرمايدى. رينگتە سەن جانە قارسىلاسىڭ بولادى. كىمنىڭ دايىندىعى مىقتى سول ۇتادى. سول ءۇشىن جاتتىعۋ ءبىرىنشى ورىندا بولۋى كەرەك!»، - دەيدى قانات يسلام.
ەسكە سالايىق، «QAZAQ» ءوزىنىڭ كەلەسى كەزدەسۋىن 9- قىركۇيەك كۇنى استانا قالاسىندا كانادالىق برەندون كۋكقا قارسى وتكىزەدى. كانادالىق بوكسشى ءوزىنىڭ سوڭعى كەزدەسىن وتانداسى ستيۆەن باتلەرگە قارسى وتكىزىپ، نوكاۋتقا تۇسىرگەن بولاتىن.
قانات يسلام بولسا ءوزىنىڭ سوڭعى كەزدەسۋىن 26- مامىر كۇنى مەكسيكالىق نوربەرتو گونسالەسكە قارسى وتكىزىپ، 12 راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىسكە جەتتى قازىرگى ۋاقىتتا وتانداسىمىزدىڭ ەنشىسىندە 24 كەزدەسۋ بار جانە بوكسشىمىز ونىڭ بارلىعىندا جەڭىسكە جەتكەن. 19 كەزدەسۋدە ول قارسىلاستارىن نوكاۋتقا جىبەرگەن.
vesti.kz
