قىتاي ساحناسىنا يرلاند ءبيىن تۇڭعىش شىعارعان قازاق ءبيشىسى - كەسكىن
«مەملەكەتتىك 1-دارەجەلى ءارتىس» - قىتاي حالىق رەسپۋبليكاسىنىڭ ونەر جۇلدىزدارىنا بەرەتىن ەڭ جوعارى اتاعى. ەكىنىڭ بىرىنە بۇيىرمايتىن دارەجەگە قانداسىمىز قالاي جەتتى؟
ءبي ونەرىنە 13 جاسىندا قادام باسقان فارحات بيماش ۇلى شىڭجاڭداعى تارباعاتاي ايماعىنىڭ تۋماسى. 1988 -جىلدان باستاپ ءوز سالاسى بويىنشا قىزمەتكە ارالاسقان ول اراعا 8 جىل ۋاقىت سالىپ بەيجىڭدە ورنالاسقان قىتايدىڭ مەملەكەتتىك فيلارمونياسىنا ءبيشى بولىپ بارادى.
فارحات وسى فيلارمونياداعى جالعىز قازاق ونەرپازى بولعانىنا قاراماستان تالانتىمەن ءالى كۇنگە ميللياردتار ەلىن تاڭ قالدىرۋمەن كەلەدى. ول ءۇش جىل جالىقپاي ەڭبەكتەنۋىنىڭ ارقاسىندا اۋەن مەن قيمىلدان قۇرالعان كۇردەلى ستەپ ءبيىن تەك تاسپاعا قاراپ ۇيرەنىپ شىعادى. قازاقتىڭ ءبيشى جىگىتى يرلانديانىڭ ۇلتتىق ءبيىن ۇيرەنىپ قانا قويعان جوق، ونى بۇل ءبي تۋرالى ەستىپ تە كورمەگەن قىتاي ساحناسىنا 2002 -جىلى تۇڭعىش رەت الىپ شىقتى. جاڭا بيىمەن جارىق جۇلدىزداي جارق ەتكەن قازاق ءبيشىسىن سول كەزدەگى قىتايلىق ب ا ق «شىعىستىڭ ستەپ ءبيى پاديشاسى» دەگەن اتپەن جارىسا جازادى.
«مەن كوپتەگەن كونكۋرستاردان ءوتىپ 1996 -جىلى مەملەكەتتىك فيلارمونياعا جۇمىسقا تۇردىم. سول كەزدە ونەر ۇجىمىنىڭ بيشىلەرگە باعىتتالعان «شەتەل بيلەرىن ەلىمىزدە دامىتۋ» دەگەن جوباسى بولدى. ءالى ەسىمدە، 1998 -جىلى ءبىر دوسىم امەريكادان يرلانديانىڭ ستەپ ءبيى جازىلعان تاسپانى سىيلىققا الىپ كەلدى. ستەپ بيىندە قيمىل مەن دىبىس ەكەۋى دە ماڭىزدى ورىندا. سوندىقتان ول كورەرمەنىن قاتتى باۋرايدى. مەنىڭ دە تابيعاتىما، ىشكى جان دۇنيەمە جاقىن بولعان بۇل بيگە بىردەن قىزىقتىم. ءسويتىپ ءبيدى تاسپادان 3 جىل تىنباي ۇيرەندىم. 2012 -جىلى فيلارمونيامىزدىڭ 40 جىلدىق تويىنا ارنالعان ۇلكەن كونسەرتتە وسى ءبيدى الىپ شىعامىن دەپ باسشىلىققا ءوتىنىش جاسادىم. باسىندا ارىپتەستەرىم ماعان سەنىمسىزدىك تانىتتى. ويتكەنى، يرلاندىقتاردان وزگە ەشكىم بيلەمەگەن بۇل ءبيدى فارحات قالاي ۇلكەن ساحناعا الىپ شىعادى دەگەن قارسى پىكىرلەر كوپ ايتىلدى.
العاشىندا 40 بيشىگە ءبىر اي بويى كۇنىنە 4 ساعات تىنباي ءبي ۇيرەتتىم. ءبىر ايدان كەيىن سەنىمسىزدىك سەيىلگەندەي بولدى. ودان كەيىنگى ەكى اي ۋاقىتتا ءبىز كۇنىنە 5 ساعاتتاپ دايىندالاتىن بولدىق. ءسويتىپ ءۇش ايدان كەيىن قىتاي ساحناسىندا تۇڭعىش رەت قىرىق «نوكەرىممەن» بىرگە ستەپ ءبيىن ءساتتى بيلەپ شىقتىم»، - دەيدى يرلانديا ءبيىنىڭ ەڭ العاش قىتاي ساحناسىندا قالاي قانات قاققانىن ەسكە العان ءبيشى.
وسىدان كەيىن فارحات بيماش ۇلى قىتايدىڭ اتىنان الەمنىڭ 20 عا جۋىق ەلىندە ونەر كورسەتىپ، ءدۇيىم قىتايدىڭ ماقتانىشىنا اينالادى. سول جىلدارى بەيجىڭگە ونەر ساپارىمەن بارعان يرلانديالىقتاردىڭ دا قازاق ءبيشىسىنىڭ ونەرىنە تاڭداي قاققانى بار ەكەن.
«سول 2000 -جىلداردىڭ باسىندا بەيجىڭگە ءبىر توپ يرلانديا ونەرپازدارى بارىپ كونسەرت قويدى. ءبىزدىڭ دە ءبىيىمىزدى تاماشالاعان يرلانديالىق ونەرپازداردىڭ جەتەكشىسى، - ستەپ ءبيىن بىزدەن وزگە ۇلتتىڭ اينىتپاي بيلەگەنىن ءبىرىنشى رەت كورىپ تۇرمىن، - دەگەنى بار ەدى»، - دەيدى ءبيشى.
قىتايداعى ەر بيشىلەر اراسىندا 45 جاسقا دەيىن ءبي ساحناسىنان تۇسپەگەن رەكوردى بار قازاق ونەرپازى ەندى قازاقتىڭ ۇلتتىق بيلەرى مەن ستەپ ءبيىن بىرىكتىرىپ بيلەۋدى كوزدەپ ءجۇرىپتى. سول ارمانىن ەڭ العاش استاناداعى «ەكسپو-2017» كورمەسىندە ورىنداۋعا مۇمكىندىك العان ءبيشىنىڭ وزىمەن جۇزدەسىپ، ءبيىن دە تاماشالادىق.
«ستەپ بيىمەن ات تۇياعىنىڭ ءدۇبىرىن، قازاق باتىرلارىنىڭ جاۋىنگەرلىگىن جاقسى بەينەلەۋگە بولادى. الداعى ارمانىم قازاق ءبيى مەن ستەپ ءبيىن بىرىكتىرىپ، ات جالىندا وسكەن قازاقتىڭ سالت- ءداستۇرىن، مادەنيەتىن بيمەن كورسەتكىم كەلەدى. سول ويدان تۋعان ءبي بۇگىن تۇڭعىش رەت استاناداعى الەمدىك كورمەنىڭ ساحناسىندا قويىلعانىنا وتە قۋانىشتىمىن. وسى جولى «ەكسپو-2017» كورمەسىنە شاڭحاي فيلارمونياسىنىڭ ارنايى ۇسىنىسىمەن قىتاي ونەرپازدارى اتىنان ونەر كورسەتىپ وتىرمىن. ياعني، شاڭحاي فيلارمونياسىنىڭ 24 ارتىسىنە ۇلتتىق ءبيىمىزدى ۇيرەتىپ، ءوزىم ستەپ ستيلىندەگى قازاق ءبيىن دايىندادىم»، - دەيدى قازاق ءبيشىسى.
تابعاش ەلىن تابان بيىمەن تامساندىرىپ جۇرگەن ءبيشىنىڭ بۇدان بولەك ماقساتتارى دا بار ەكەن. ونىڭ پىكىرىنشە، ۇلتتىق ءبي داۋىرمەن بىرگە دامىپ وتىرۋى ءتيىس. سوندا عانا ول ومىرشەڭ بولادى.
«قاراپ وتىرساڭىز، يرلانديانىڭ ستەپ ءبيى ەڭ العاش پايدا بولعانداعىعا قاراعاندا كوپ وزگەرگەن. ءبىراق، بۇگىنگى كۇنگە دەيىن ءوز كورەرمەنىن قاناعاتتاندىرىپ وتىر. مىسالى، «قاراجورعانىڭ» كەي قيمىلدارى ءبىزدىڭ جاستارعا ۇناماي جاتادى. سوندىقتان ءبىز سياقتى ءبي ماماندارى قازاق بيلەرىنە دە جاڭالىق ەنگىزىپ، زامانعا لايىقتاۋىمىز كەرەك دەپ ەسەپتەيمىن. سوندا عانا ۇلتتىق ءبيدىڭ ءبىر قالىپتا قالىپ، ءتىپتى جويىلىپ كەتۋىنە جول بەرمەيمىز»، - دەيدى مامان.
بۇگىنگى كۇنى بۇكىل قازاقتىڭ ماقتانىشىنا اينالعان ءبي شەبەرى بولاشاقتا ۇسىنىستار بولىپ جاتسا قازاق توپىراعىندا وسكەن قارا دومالاقتارعا دا ونەرىن ۇيرەتكىسى كەلەتىنىن ايتىپ، اڭگىمەسىن اياقتادى.
ۆيدەو: ابزال قاليەۆ
مايگۇل سۇلتان
Baq.kz
