تانىمال گولليۆۋد جۇلدىزى قازاقستاننىڭ قايىرىمدىلىق قورىنا قاراجات اۋدارادى

استانا. قازاقپارات - امەريكالىق اكتەر، «وسكار» سىيلىعىنىڭ يەگەرى، «كيڭ كوڭ»، «جىرتقىش»، «پيدجاك»، «پيانيست» فيلمدەرىندە باستى رولدەردى سومداۋشى ەدريان بروۋدي قازاقستاننىڭ قايىرىمدىلىق قورلارىنىڭ بىرىنە قارجىلاي كومەك كورسەتەدى، دەپ حابارلايدى قازاقپارات ءتىلشىسى.

بۇل تۋرالى اتاقتى اكتەر استانادا XIII حالىقارالىق «ەۋرازيا» كينوفەستيۆالىنە ارنالعان باسپا ءسوز ءماسليحاتىندا ءمالىم ەتتى.

«سۋرەت سالۋمەن بالا كەزىمنەن بەرى اينالىسامىن. مەن ءۇشىن ونەر - جاي عانا كارتينا سالۋ ەمەس، شىعارماشىلىقتىڭ بوستاندىعى، تالانتتى ادامداردىڭ شىعارماشىلىعى مەن جانىنىڭ دەربەستىگى ىسپەتتەس. سونداي-اق، كينەماتوگرافيا مەن ونەردە قاتار ءجۇرۋىم تابيعاتتى قورعاۋ، ۆ ي چ- پەن اۋىراتىن ادامدارعا كومەك، بالالاردىڭ دەنساۋلىعى باعىتتارىنداعى فيلانتروپتىق، قايىرىمدىلىق شارالارىنا قاتىسۋىما دا ۇلكەن سەپتىگىن تيگىزىپ جاتىر. وى ورايدا، بالالاردىڭ ءال- اۋقاتىمەن اينالىساتىن قازاقستاندىق ۇيىمداردىڭ بىرىنە دە قايىرىمدىلىق جاساۋدى جوسپارلاپ وتىرمىن»، - دەدى ەدريان بروۋدي.

اكتەردىڭ ايتۋىنشا، ءوزى سالعان كارتينا ساتىلىمىنان تۇسكەن قاراجات قايىرىمدىلىقپەن اينالىساتىن قازاقستاندىق ۇيىمداردىڭ نەمەسە جوبالاردىڭ بىرىنە اۋدارىلادى. ەسكە سالا كەتسەك، كەشە «قازاقستان» ورتالىق كونسەرت زالىندا «ەۋرازيا» كينوفەستيۆالىنىڭ اشىلۋ سالتاناتى وتەدى. وعان «ا» ساناتىنداعى نيكولاس كەيدج، ەندريەن بروۋدي، دجون مالكوۆيچ سىندى تانىمال الەمدىك جۇلدىزدار قاتىسادى.

كينوفەستيۆال اياسىندا كينو ونەرىنىڭ الەمدىك جۇلدىزدارى نيكولاس كەيدج، ەندريەن بروۋدي، دجون مالكوۆيچ جانە باسقا دا جۇلدىزدار شەبەرلىك ساباقتارىن وتكىزەتىن بولادى.

اۆتور: ايجان سەرىكجان قىزى