الان بورىبايەۆتىڭ ونەرىنە ءتانتى بولعان گولليۆۋد جۇلدىزى ديريجەردىڭ ءرولىن سومداۋعا ۋادە بەردى
«ماعان قازاقستاندى وتە سۇلۋ ادامداردىڭ مەكەنى دەپ ايتقان بولاتىن. ونەردى جوعارى باعالايتىن، ونەر ادامدارىن ەرەكشە قۇرمەت تۇتاتىن حالىق دەپ سيپاتتادى جانە وعان ءوزىمنىڭ دە كوزىم جەتتى.
كەشە مارتەبەلى مينيستر استانا وپەراعا كونسەرتكە شاقىردى، وندا گۋستاۆ ماللەردىڭ سەگىزىنشى سيمفونياسىن تىڭدادىق. الان بورىبايەۆتىڭ ديريجەرلىگىمەن 1200 مۋزىكانت ورىنداعان بۇل تۋىندىنىڭ عاجاپتىعىن سوزبەن ايتىپ جەتكىزە المايمىن. مۇنداي كەرەمەتتى ەش جەردەن كورگەن ەمەسپىن. الان بورىبايەۆتىڭ شابىت سىيلاعانى سونشالىقتى، بولاشاقتا ديريجەردىڭ ءرولىن سومدايمىن دەپ ءوز- وزىمە سەرت بەردىم»، - دەيدى اكتەر.
اڭىزعا اينالعان اكتەر XIII حالىقارالىق «ەۋرازيا» كينوفەستيۆالىنە قاتىسۋ ءۇشىن استاناعا 21- شىلدە دە ۇشىپ كەلدى. كەلىسىمەن ەكسپو، استانا وپەرا، ەتنواۋىل سىندى استانانىڭ كوز تارتار ورىندارىنا تاماشالادى. «استاناعا العاش كەلىپ وتىرعان جوقپىن. الايدا، ءار ساپارىم سايىن بۇل قالا جاڭا عيماراتتارىمەن جانە ەرەكشە ورىندارىمەن تاڭ قالدىرۋدان جالىقپايدى. ءبىر كۇندە ەكسپو، استانا وپەرا، ەتنواۋىلدى ارالاپ شىقتىم، مۇنداي قىزىقتى باعدارلاما بولارىن كۇتپەدىم»، - دەپ اعىنان جارىلدى اكتەر.
ايتا كەتەرلىگى، 22-28 -شىلدە كۇندەرى استانادا «ەۋرازيا» كينوفەستيۆالى وتەدى. وعان نيكولاس كەيدج، ەندريەن بروۋدي، دجون مالكوۆيچ سىندى الەمگە تانىمال جۇلدىزدار ارنايى كەلدى. اتاقتى اكتەرلەر ونەر ۋنيۆەرسيتەتىنىڭ ستۋدەنتتەرىنە شەبەرلىك ساباقتارىن وتكىزەتىن بولادى. فەستيۆال كەزىندە سوڭعى ءبىر جىلدا ەكرانعا شىققان فيلمدەر كورسەتىلەدى. ولاردىڭ ىشىندە قىسقا جانە تولىق مەتراجدى كارتينالار، اۆتورلىق جانە جانرلىق كينو بار.
بۇدان بولەك، «بەس قۇرلىق» اتتى بالالار فيلمدەرىنىڭ كونكۋرسى ۇيىمداستىرىلادى. ال ورتالىق ازيا مەن تۇركى تىلدەس ەلدەر كينەماتوگرافيا سالاسىنداعى «تۇلپار» ۇلتتىق سىيلىعى ءۇشىن باق سىناسادى. «XIII حالىقارالىق «ەۋرازيا» كينوفەستيۆالى اياسىندا العاش رەت Eurasia Film Market ۇيىمداستىرىلادى. وعان فيلمدەر نارىعىندا جۇرگەن ساتۋشىلار مەن ساتىپ الۋشىلار قاتىسادى.
