ديماش قۇدايبەرگەن الەمدەگى ەڭ تانىمال ماراپاتتاردىڭ ءبىرىن ەنشىلەدى

استانا. قازاقپارات - قازاقستاندىق ءانشى ديماش قۇدايبەرگەن الەمدەگى ەڭ ۇلكەن مۋزىكالىق ماراپاتتاردىڭ ءبىرىن ەنشىلەدى.

بۇل تۋرالى ءانشىنىڭ پروديۋسەرى ءارى رەسمي وكىلى الپامىس شاريموۆ ينستاگرامداعى جەكە پاراقشاسىندا حابارلادى.

«ەكىنشى كۇن قاتارىنان ۇلكەن ماراپات! الەمدەگى ەڭ ۇلكەن ماراپاتتاردىڭ الدى بولىپ تابىلاتىن MTV Music awards جۇلدەسى تۇڭعىش رەت قازاق بالاسىنىڭ ەنشىسىندە! بۇل تاريح! قۇتتى بولسىن، جان دوسىم!!!» - دەپ جازىلعان حابارلامادا.

بۇعان دەيىن الپامىس ب ا ق وكىلدەرىنە ديماشتىڭ گۋاڭجوۋدا وتەتىن MTV Music Awards Asia شاراسىنا قاتىساتىنىن حابارلاعان.

قازاقستاندىق ءانشى وندا «ازيانىڭ ەڭ تانىمال شەتەلدىك ءانشىسى» اتالىمىنا ۇمىتكەر رەتىندە قاتىساتىنىن ءمالىم ەتكەن.

ەسكە سالا كەتەيىك، كۇنى كەشە ديماش قۇدايبەرگەن قىتايدا Asian Music GaLa ماراپاتتاۋ كەشىندە "ەڭ تانىمال شەت ەلدىڭ ءانشىسى" نوميناتسياسىنىڭ يەگەرى اتانعان بولاتىن.

اۆتور: ەربول جانات