بريتاندىق مينيستر قازاقستاندىق يننوۆاتورلاردى لوندونعا شاقىردى

استانا. قازاقپارات -  ۇلى بريتانيانىڭ ساۋدا جانە ينۆەستيتسيالار ءمينيسترى گرەگ حەندس ءوز ەلىنىڭ قازاقستانمەن ءتۇرلى سالالار بويىنشا ىنتىماقتاستىقتى كەڭەيتكىسى كەلەتىنىن جەتكىزدى، دەپ حابارلايدى قازاقپارات ءتىلشىسى.

«قازاقستانمەن جالپى ساۋدا كولەمىن ۇلعايتقىمىز كەلەدى. ءبىز قازاقستانعا كوپ ينۆەستيتسيا سالامىز، قازاقستان ءبىزدىڭ ينۆەستيتسيالار بويىنشا 6-ورىندا تۇر. بۇل قازاقستان ەگەمەندىك العان ساتتەن بەرى جەرگىلىكتى ەكونوميكاعا 20 ميلليارد فۋنت ستەرلينگ ينۆەستيتسيالادىق دەگەن ءسوز. سونداي-اق، ءبىز اقىلدى قالالار بويىنشا ءوز زەرتتەمەلەرىمىزدى قازاقستانعا اكەلىپ، تەحنولوگيالار سالاسىندا ىنتىماقتاستىقتى كەڭەيتكىمىز كەلەدى. ودان بولەك، ينفراقۇرىلىمدىق نىساندار بويىنشا ىنتىماقتاسۋدى قالايمىز»، - دەدى گرەگ حەندس.

سونىمەن بىرگە،  ۇلى بريتانيا ءمينيسترى بيزنەستى كەڭەيتۋ ءۇشىن قازاقستاندىق يننوۆاتورلار مەن كاسىپكەرلەردى ءوز ەلىنە شاقىردى. حەندس كەلەسى جىلى اعىلشىندىق تاراپتىڭ «استانا» حالىقارالىق قارجى ورتالىعىمەن تىعىز ىنتىماقتاستىعىنىڭ باستالاتىنىن ەسكە سالدى.

«ەگەر قازاقستاندىق تەحنولوگيا جاساۋشىلار ەۋروپادا ءوز كەڭسەسىن اشقىسى كەلسە، وعان ەڭ قولايلى ورىن  ۇلى بريتانيا بولماق. 2016 -جىلدىڭ ناۋرىز ايىندا ءبىز قازاقستاندىق تاراپپەن ءوزارا تۇسىنىستىك تۋرالى مەموراندۋمعا قول قويدىق، ال 1 -قاڭتاردان باستاپ، «استانا» حالىقارالىق قارجى ورتالىعىمەن جۇمىس باستالادى. ءبىزدىڭ مىندەتىمىز - قازاقستاندىق تاراپپەن بىرلەسىپ، استانادا قارجىلىق قىزمەتتەر كورسەتەتىن وڭىرلىك حاب قۇرۋ»، - دەپ اتاپ ءوتتى ول.

«قارجىلىق قىزمەتتەر كورسەتۋدە  ۇلى بريتانيا الەمدىك كوشباسشى بولعاندىقتان، «استانا» حالىقارالىق قارجى ورتالىعىنىڭ سەرىكتەس رەتىندە ءبىزدى تاڭداۋى - زاڭدىلىق، - دەپ جالعاستىردى مينيستر. - ءبىز قازاقستاندىق كومپانيالاردى الەمدىك قارجى نارىعىنا قولجەتىمدىلىكپەن قامتاماسىز ەتكىمىز كەلەدى جانە بۇل ىنتىماقتاستىقتا جەكەشەلەندىرۋ ايتارلىقتاي ماڭىزدى فاكتور بولىپ تابىلادى. «استانا» قارجى ورتالىعى قازاقستاندىق كاسىپكەرلەر مەن لوندوننىڭ ىسكەرلىك بولىگى اراسىنداعى كوپىرگە اينالۋى ءتيىس».

حەندس  ۇلى بريتانيا استاناسىنداعى «جاسىل» تەحنولوگيالاردىڭ دامۋى جونىندە دە ايتىپ بەردى. تۇماندى البيون ءۇشىن بۇل تەحنولوگيالار اۋاداي قاجەت بولعان كورىنەدى. «لوندوندا يننوۆاتسيالىق تەحنولوگيالاردى قولدانۋ اسا قاجەت، سەبەبى قالا حالقىنىڭ سانى ارتقان سايىن، اۋا ساپاسىن دا جاقسارتۋ قاجەتتىگى تۋىندايدى. ماسەلەن، لوندون مەتروسى الەمدەگى العاشقى مەتروپوليتەندەردىڭ ءبىرى، ول ءوز جۇمىسىن 19-عاسىردىڭ 70-جىلدارىندا باستادى. جولاۋشىلاردىڭ سانى كوبەيگەن سايىن، مەترونىڭ دا باعدارشامدار مەن پويىز قوزعالىسىن رەتتەۋ جۇيەلەرىن جاڭارتۋ قاجەت، پويىزداردىڭ ۋاقىت ارالىعىن قىسقارتۋ كەرەك»، - دەدى بريتاندىق ۆەدومستۆو باسشىسى.

سونداي-اق، بريتاندىق مينيستر جاڭا ماسەلەلەر تۋىنداماۋ ءۇشىن ەكولوگيالىق تازا اۆتوموبيلدەردى بەلسەندى تۇردە ەنگىزۋ قاجەتتىگىن باسا ايتتى. «تاعى ءبىر كوپ تارالعان تەحنولوگيا - ەلەكتر كولىكتەرىن ەنگىزۋ. ەگەر ولاردى كەڭ اۋقىمدا قولدانار بولساق، كوپتەگەن قۋاتتاۋ ستانتسيالارى كەرەك بولادى. بۇل دا وزەكتى ماسەلە، سەبەبى اۆتوتۇراقتاردىڭ اۋماعىن كىشىرەيتۋ قاجەتتىگى تۋىندايدى. ەلەكتر كولىكتەرىنە ارنالعان قۋاتتاۋ قۇرىلعىلارىن كوشە شامدارىنا ورناتۋعا بولاتىن تەحنولوگيا بار. ياعني، شام كوشەگە جارىق شاشىپ قانا قويماي، ەلەكتر ماشينالارىنا قۋات بەرەدى»، - دەدى حەنكس.

ەسكە سالا كەتسەك، بۇعان دەيىن بريتاندىق مينيستر بريتاندىق كومپانيالاردىڭ جاقىندا استانا اكىمدىگىمەن تىعىز ىنتىماقتاستىقتا جۇمىس ىستەيتىنىن حابارلاعان ەدى. اتاپ ايتقاندا، Gillespie كومپانياسى قالانىڭ جاڭا باس جوسپارى ءۇشىن تەحنيكالىق تاپسىرماسىن ازىرلەۋ مەن ينفراقۇرىلىمدىق جوبالار بويىنشا ىنتىماقتاستىقتى باستاپ كەتتى.

اۆتور: ايجان سەرىكجان قىزى