ديماش قۇدايبەرگەن قىتايدا ەڭ تانىمال شەتەل ءانشىسى اتاندى - فوتو، كەسكىن
بۇل تۋرالى الپامىس شاريموۆ ينستاگرامداعى جەكە پاراقشاسىندا حابارلادى. «ءسۇيىنشى! Asian Music GaLa ماراپاتتاۋ كەشىندە ديماش «ەڭ تانىمال شەت ەلدىڭ ءانشىسى» نوميناتسياسىنىڭ يەگەرى اتاندى! قۇتتى بولسىن!!! ءبىزدىڭ بالا شەت ەلدە "ەڭ تانىمال ءانشى"!!! راحمەت، Dears!!! راحمەت، ۇيىمداستىرۋشىلار!!!» - دەپ جازعان ديماش قۇدايبەرگەننىڭ دوسى ءارى پروديۋسەرى الپامىس شاريموۆ.
ايتا كەتەيىك، بۇعان دەيىن الپامىس Asian Music GaLa ماراپاتتاۋ كەشىندە قاتىسۋ ءۇشىن قىتايدىڭ گۋاڭجوۋ قالاسىنا ۇشىپ جەتكەنىن حابارلاعان بولاتىن.
ال ديماش قۇدايبەرگەن ساحنا تورىنەن قازاق تىلىندە كەشتى ۇيىمداستىرۋشىلارعا العىسىن جەتكىزدى: «قۇرمەتتى ونەر سۇيەر قاۋىم! بارشاڭىزعا كوپ راحمەت ايتقىم كەلەدى. بارشا قازاق ەلىنىڭ اتىنان وسىناۋ ازيا مەملەكەتتەرى اراسىندا ءوتىپ جاتقان ءىرى جوبادا بوي كورسەتۋگە مۇرىندىق بولىپ تۇرعاندارىڭىزعا كوپ راحمەت ايتقىم كەلەدى».
اۆتور: ەربول جانات
