مۇقاعاليدىڭ ابايعا ارنالعان ولەڭى تابىلدى

استانا. قازاقپارات - ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي مەموريالدىق قورىق- مۋزەيى مۇراعاتىندا جيناقتالعان گازەت- جۋرنال تىگىندىلەرىن اقتارۋ ۇستىندە ۇلى اقىن مۇقاعاليدىڭ «دالا دانىشپانى» دەگەن ولەڭى كوزگە وتتاي باسىلدى!

ءبىزدىڭ بىلۋىمىزشە، بۇل ولەڭ مۇقاعاليدىڭ جىر جيناقتارىندا بۇرىن-سوڭدى جاريالانباعان.

سوندىقتان قازاقتىڭ XIX عاسىردا ءومىر سۇرگەن ۇلى اقىنىنا ارنالعان XX عاسىردا عۇمىر كەشكەن تاعى ءبىر ۇلى اقىنىنىڭ ەرەكشە قۇرمەت پەن ماقتانىش سەزىمى تۇنعان ولەڭىن جاريالاۋعا اسىقتىق.

دالا دانىشپانى

دالا جاتىر - ءون بويى تۇنعان ولەڭ،

اباي، مىنە، جاپاندا تۇرعان ەمەن.

اتا ءسوزى تەربەتكەن بەسىگىمدى،

اتا ءسوزىن ومىردە تىڭداپ ولەم.

 

...ۇلى ەمەس اباي جالعىز ساحارانىڭ،

 (مەن ەمەس، سولاي دەگەن اتالارىم).

سول ۇراندى ۇرپاققا اپارامىن،

مەن قازاق - اباي بولىپ اتانامىن.

 

ۋھ، دالا!

دالا تولعان كول- كوسىر جىر،

دالا - قوبىز تۇتپايدى پەرنەسىن كىر.

ءتىرى ابايدى الديلە، دارحان دالام،

ولەڭ سەلى ءوڭىردى تەربەسىن ءبىر.

 

دالا، دالا...

سال - دالا سەلەۋلەگەن،

جىرمەن ۇيىقتاپ، ويانعان ولەڭمەنەن.

دالا دەگەن - كۇي ساندىق بۇل قازاققا،

اباي دەسە قۇلاعى ەلەڭدەگەن.

 

جىلدار، جىلدار...

قانشاما الىستادىق،

قانشاما وزەن وزگەرتتى اعىستارىن.

ۋاقىت وزدى، سەن ءبىراق قالىسپادىڭ،

ۋا، ارمىسىڭ، ارىسىم، دانىشپانىم!

مۇقاعالي ماقاتايەۆ.

 

"قازاق ادەبيەتى"، 13 -تامىز، 1965ج.