كورەيا قازاقستاندىق تۋريستەردى تەكسەرۋدى كۇشەيتتى

استانا. قازاقپارات - كورەيا رەسپۋبليكاسى قازاقستاننان كەلگەن زاڭسىز ميگرانتتاردىڭ كوبەيۋىنەن ەلىمىز ازاماتتارىنا قاتىستى تەكسەرۋدى كۇشەيتتى.

بۇل تۋرالى ق ر سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى ارداق ماديەۆ پەن كورەيا رەسپۋبليكاسىنىڭ قازاقستانداعى ەلشىسى كيم دە سيكتىڭ قاتىسۋىمەن وتكەن باسپا ءسوز ءماسليحاتىندا ءمالىم بولدى، دەپ حابارلايدى قازاقپارات.

سپيكەرلەردىڭ ايتۋىنشا، سوڭعى ۋاقىتتا كوشى- قون پروتسەدۋرالارىن ءوتۋ كەزىندە قازاقستان ازاماتتارىنا كورەيا رەسپۋبليكاسىنا كىرۋگە رۇقسات بەرمەۋ جاعدايلارى ءجيى ورىن الادى. ونىڭ باستى سەبەبى - 2014 -جىلدىڭ قاراشا ايىندا كۇشىنە ەنگەن قازاقستان رەسپۋبليكاسى مەن كورەيا رەسپۋبليكاسى اراسىنداعى ۆيزالىق رەجىمدى الىپ تاستاۋ تۋرالى كەلىسىم.

كەلىسىم كورەيادا جۇمىسقا ورنالاسپايتىن ازاماتتارعا قاتىستى بولىپ وتىر. «قازاقستاننىڭ كوپتەگەن ازاماتتارى كورەياعا ۆيزاسىز رەجىم ارقىلى بارىپ، جۇمىسقا ورنالاسقىسى كەلەدى. وسىعان بايلانىستى، 2014 -جىلى ەكى ەل اراسىندا ۆيزاسىز رەجىم ورناعالى، كورەيادا زاڭسىز جۇرگەن قازاقستاندىقتاردىڭ سانى كۇرت ءوستى»، - دەپ اتاپ ءوتتى كيم دە سيك.

سول سەبەپتى، كورەيا رەسپۋبليكاسىنىڭ كوشى- قون ورگاندارى قازاقستان ازاماتتارىنا قاتىستى تەكسەرىستى كۇشەيتۋ تۋرالى شەشىم قابىلداعان. جاريالانعان دەرەكتەرگە سايكەس، 2017 -جىلى ناۋرىز ايىندا كورەيا اۋماعىندا قازاقستاندىق 4168 زاڭسىز ميگرانتتىڭ بارى انىقتالعان. 2014 -جىلى ۆيزاسىز رەجىم تۋرالى كەلىسىمگە قول قويىلعانعا دەيىن، بۇل كورسەتكىش 359 ادام بولعان.

ياعني، ءۇش جىلدا قازاقستاندىق زاڭسىز ميگرانتتار سانى 11 ەسەگە وسكەن.

2014 -جىلى قازاقستاننان كورەياعا باراتىن جاڭا ميگرانتتاردىڭ جىلدىق كولەمى 77 ادامدى قۇراعان ەدى. ال ۆيزاسىز رەجىم تۋرالى كەلىسىمگە قول قويىلعان سوڭ، بۇل كورسەتكىش 45 ەسەگە ارتقان، ياعني جىل سايىن كورەياعا 3520 قازاقستاندىق ميگرانت بارادى.

اۆتور: ايجان سەرىكجان قىزى