قازاق عالىمدارى يتاليادان التىن وردا قالاسى بەينەلەنگەن كارتانى تاپتى

استانا. قازاقپارات - ەۋروپادا تۇركىتانۋشى عالىمدار ىنتىماقتاستىق ورناتتى. بۇل تۋرالى تانىمال قازاقستاندىق ساياحاتشى ساپار ىسقاقوۆ فەيسبۋكتەگى پاراقشاسىندا ايتتى، دەپ حابارلايدى قازاقپارات ءتىلشىسى.

«يتاليادا تۇركىتانۋشىلار ىنتىماقتاستىق ورناتتى. قازاقستاندىق عالىمدار الەمدەگى ەڭ كونە وقۋ ورداسى سانالاتىن ريمدەگى Sapienza ۋنيۆەرسيتەتىنە باردى. ونداعى ماقسات - تۇركىتانۋشىلار جانە عالىمدارمەن ىنتىماقتاستىق ورناتۋ. ەكسپەديتسيا مۇشەلەرى ۆەنەتسيا مۇراعاتىنان فرا ماۋرو موناحىنا تيەسىلى ورتا عاسىرداعى العاشقى زاماناۋي كارتانى تاپقان. وندا التىن وردانىڭ استاناسى ساراي-باتۋ قالاسى بەينەلەنگەن. تاريحشىلاردى اسىرەسە التىن وردامەن ساۋدا- ساتتىق جاساسقان ۆەنەتسيا مەن گەنۋيا كوپەستەرىنىڭ ەسەپ كىتاپشالارى قىزىقتىرادى»، - دەپ جازادى ساياحاتشى الەۋمەتتىك جەلىدەگى پاراقشاسىندا.

ايتا كەتەيىك، 2017 -جىلدىڭ 4 -مامىرىندا ساپار ىسقاقوۆ جەتەكشىلىك ەتەتىن «بابالار ىزىمەن» اتتى عىلىمي ەكسپەديتسيا جولعا شىققان بولاتىن. ولار ەجەلگى عۇندار، تۇرىكتەر، قىپشاقتاردىڭ ءىزى قالعان الەمنىڭ 15 ەلىنە بارماق نيەتتە. 65 كۇنگە سوزىلاتىن بۇل ساپاردا ەكسپەديتسيا توبى قازاقستان، رەسەي فەدەراتسياسى (كاباردينو- بالقار رەسپۋبليكاسى، قاراشاي- شەركەش رەسپۋبليكاسى، داعىستان رەسپۋبليكاسى)، ازەربايجان، ارمەنيا، گرۋزيا، ۋكراينا، مولدوۆا، سلوۆەنيا، بەلارۋس، ليتۆا، پولشا، گەرمانيا، فرانسيا، ۆەنگريا، يتاليا، ۆاتيكان جەرلەرىن ارالايدى جانە ارعى اتا-بابالارىمىزدىڭ ەجەلدەن قازىرگى زامانعا دەيىنگى كوشى-قون جاعدايىمەن تانىسىپ، د ن ق زەرتتەۋلەر جۇرگىزەدى.

اۆتور: گۇلسايا جاقان