قاربىزدان ۋلانىپ قالماۋ جولدارىن ايتتى
جاز باستالعالى بەرى قاۋىن- قاربىز تۇرعىنداردىڭ جەڭسىك اسىنا اينالعانى راس. دۇكەن سورەلەرىنە تۇسەتىن باقشا ونىمدەرىن دەپارتامەنت ماماندارى قاتاڭ تەكسەرۋدەن وتكىزەدى ەكەن. ماماندار تۇتىنۋشىلارعا باقشا ونىمدەرىن شىلدەنىڭ ورتاسىنان باستاپ ساتىپ الۋعا كەڭەس بەرەدى.
«دەپارتامەنت قالاداعى دۇكەن سورەلەرىنە تۇسەتىن ازىق- تۇلىكتىڭ ساپاسىن جانە قاۋىپسىزدىگىن تەكسەرىپ تۇرادى. بيىل قاۋىپتىلىك كورسەتكىشى اسىپ كەتكەن ءونىم تابىلمادى. قاۋىن مەن قاربىز جانە باسقا دا باقشا ونىمدەرى ساۋدادان شىعارىلعان جوق»، - دەدى دەپارتامەنت باسشىسىنىڭ مىندەتىن اتقارۋشى مۇرات ءبىرجانوۆ.
ونىڭ ايتۋىنشا، بيىل قاۋىن قاربىز جەپ ۋلانۋ جاعدايى تىركەلمەدى. مامانداردىڭ ايتۋىنشا، ادامداردىڭ اۋىرۋىنا باسقا دا فاكتورلار ىقپال ەتۋى مۇمكىن. «اتاپ ايتقاندا، قولدى جاقسىلاپ جۋماۋ، جەكە باس گيگيەناسىنىڭ تالاپتارىن ساقتاماۋ اۋرۋعا اكەلۋى ىقتيمال»، - دەدى ول. دەپارتامەنت وكىلى تۇتىنۋشىلارعا قاربىزدى جول بويىنان ەمەس، ارنايى ساۋدا نۇكتەلەرىنەن ساتىپ الۋعا كەڭەس بەرەدى.
«قاربىز الار كەزدە ونىڭ سىرتقى تۇسىنە نازار اۋدارىڭىز. پىسكەن قاربىزدىڭ ءتۇسى اشىق ءارى قابىعى جىلتىر بولۋى ءتيىس. مۇرتشاسى قۋراعان قاربىز پىسكەن دەپ سانالادى. سونداي-اق، ساتىپ الار كەزدە كەسىلمەگەن قاربىز العان دۇرىس. ويتكەنى جايما بازارلاردا قاربىزدى كەسىپ بەرۋ ادەتكە اينالعان. ساۋداگەرلەر پىشاقتى تازالامايدى، كىر شۇبەرەكپەن سۇرتە سالادى. وپ- وڭاي اۋرۋ جۇقتىرۋىڭىز مۇمكىن. اتاپ ايتقاندا، ءتۇرلى ميكروورگانزيمدەردىڭ كەسىرىنەن توكسيكوينفەكسيا بولۋى عاجاپ ەمەس»، - دەدى مۇرات ءبىرجانوۆ.
اۆتور: گۇلميرا عوسمان-ءالي
