جات اعىمعا كىرىپ، تاعدىرى تالكەككە تۇسكەن اقتوبەلىك كەلىنشەك تۋرالى فيلم ءتۇسىرىلدى - كەسكىن
اقتوبە وبلىستىق ءدىن ىستەر باسقارماسى مەن «اڭسار» اقپاراتتىق- تالداۋ ورتالىعى دىندە شەكتەن شىعىپ، اسىرا سىلتەگەن قىزدىڭ اڭگىمەسىن جارىققا شىعاردى. بەينەجازبادا اقتوبەلىك كەلىنشەك كۇيەۋگە شىعىپ، ءدىن جولىنا تۇسكەنىن ايتىپ بەردى.
«قىز بالا راديكالدى باعىتتى ۇستانادى. بۇل بەينەونىمدى «اڭسار» تالداۋ ورتالىعى ءوز كۇشىمەن ءتۇسىردى. قىسقا مەتراجدى، ەكى بولىمنەن تۇرادى. 16 جاسىندا جات اعىمدا جۇرگەن ەر اداممەن نەكە قيعان. بىرنەشە جىل وتكەن سوڭ ول جىگىت تالاق ەتىپ، قىزدى تاستاپ كەتەدى.
سودان كەيىن قىز تۇرمەدە وتىرعان ەر اداممەن سويلەسىپ، تەلەفون ارقىلى نەكە قيعان. بۇل ەشقانداي شاريعاتقا ساي ەمەس. بىرنەشە جىلدان سوڭ اجىراسىپ، ءۇشىنشى رەت تاعى جات اعىم جەتەگىندە جۇرگەن اداممەن نەكەلەسەدى. ءدام- تۇزى جاراسپاي، تاعى اجىراسقان.
قىز 6 جىلداعى ءومىرىن باياندايدى. تەولوگتارمەن تىلدەسىپ، ءوزىنىڭ قاتە باسقانىن ءتۇسىندى. ءۇش رەت اجىراسقان كەلىنشەك قالادا تۇرادى، قالىپتى ومىرگە ارالاسىپ، جۇمىس ىستەپ ءجۇر»، - دەدى «اڭسار» اقپاراتتىق تالداۋ ورتالىعىنىڭ ديرەكتورى جانساۋلەت سۇلەيمەنوۆ.
ايتا كەتەيىك، بەينەجازبا كەزىندە اقتوبەلىك كەلىنشەك كۇيەۋگە شىققان كۇننەن باستاپ، كۇنى بۇگىنگە دەيىنگى ءومىرى تۋرالى باياندادى. ول ناماز وقۋ، جات اعىمدى ناسيحاتتايتىن كىتاپتار مەن بەينەماتەريالداردىڭ تارالۋى، ءوزىنىڭ تۇراقسىز، قورقىنىشتى ءومىرىن وزگەگە ۇلگى بولسىن دەگەن نيەتپەن جەتكىزدى.
«قازىر اتا-اناممەن قارىم-قاتىناسىم جاقسى. ول كىسىلەردەن ءالى دە كەشىرىم سۇرايمىن. ولار ماعان ءالى دە رەنجۋلى. ولارعا ايتپاعان ءسوزىن، ءىسىم قالمادى. ءومىردىڭ اۋىر كەزەڭىن وتكەردىم، ءالى دە وكىنەمىن. سەبەبى، اكەم مەن انام كەلىپ، جىلاعان كەزدە «سەندەر كاپىرسىڭدەر» دەپ كەتىپ قالعان ەدىم»، - دەدى اقتوبەلىك اداسقان كەلىنشەك ءوز سوزىندە.
«اڭسار» اقپاراتتىق تالداۋ ورتالىعىنىڭ مالىمەتىنشە، جىل باسىنان بەرى جات اعىمدا جۇرگەن 200 گە جۋىق ادامنىڭ كوزقاراسى وزگەرگەن. ولار قالىپتى ومىرگە كەلدى. بۇعان دەيىن حابارلاعانىمىزداي، وبلىس اكىمى بەردىبەك ساپاربايەۆ جات اعىم جەتەگىندە جۇرگەندەرمەن كۇرەس ناتيجەلى بولۋى ءۇشىن سالافيزمگە زاڭدى تۇردە تىيىم سالۋ كەرەك دەپ ۇسىنىس ايتقان بولاتىن. سونىمەن قاتار، ولاردىڭ قارجىلاندىرۋ كوزىن تاۋىپ، جويۋ تۋرالى دا ايتتى.
اۆتور: التىناي ساعىندىقوۆا
