نۇرسۇلتان نازاربايەۆ ەلىمىزدىڭ سىرتقى ساياساتىنىڭ نەگىزگى باعىتتارىن اتادى

استانا. قازاقپارات - ەلباسى نۇرسۇلتان نازاربايەۆ قازاقستاندا تىركەلگەن ديپلوماتيالىق ميسسيا وكىلدەرىمەن كەزدەسۋ بارىسىندا ەلىمىزدىڭ سىرتقى ساياساتىنىڭ نەگىزگى باعىتتارىن اتادى، دەپ حابارلايدى قازاقپارات.

قازاقستان پرەزيدەنتىنىڭ دەرەگىنشە، تاۋەلسىزدىك جىلدارى ىشىندە ەلىمىز 182 مەملەكەتپەن دوستىق ءارى كونسترۋكتيۆتى قارىم- قاتنىاس ورناتتى. شيرەك عاسىردىڭ ىشىندە شەتەلدەردە قازاقستاننىڭ 57 ەلشىلىگى مەن 31 ديپلوماتيالىق مەكەمەسى اشىلدى. ال ەلىمىزدە 95 شەتەلدىڭ ەلشىلىگى مەن حالىقارالىق ۇيىمداردىڭ وكىلدىكتەرى جۇمىس ىستەۋدە. ەلباسى الدىمەن رەسەي جانە قىتايمەن ستراتەگيالىق ىنتىماقتاستىق جايىندا توقتالىپ، ورتالىق ازيا ەلدەرى دامۋدىڭ جاڭا كەزەڭىنە اياق باسقاندىعىن ەسكە سالىپ ءوتتى.

«بۇل رەتتە ءبىزدىڭ ساياساتىمىز ەڭ الدىمەن تەڭ قۇقىلى ارىپتەستىك پەن ەلىمىزدىڭ وڭىردەگى ءرولىن ارتتىرۋ ءۇشىن كۇش بىرىكتىرۋگە جانە «بەستىك» ەلدەرىنىڭ گۇلدەنۋىن قامتاماسىز ەتۋگە باعىتتالاتىن بولادى. كورشىلەرىمىزبەن تاريحي، مادەني جانە تىلدىك تامىرلاستىعىمىزدى ەسكەرە وتىرىپ، بىرلەسە جۇمىس ىستەۋگە باسا نازار اۋدارامىز» ، - دەدى مەملەكەت باسشىسى.

مەملەكەت باسشىسىنىڭ ا ق ش- پەن سەرىكتەستىك باعىتى جالعاسىپ، قازاقستاننىڭ ەڭ ءىرى ساۋدا- ەكونوميكالىق سەرىكتەسى سانالاتىن ەۋروپالىق وداقپەن جان- جاقتى قارىم- قاتىناستى دامىتۋ ىلگەرىلەتىلە تۇسەتىندىگىن باسا ايتتى.

 «وزدەرىڭىزدە بىلەتىندەي، ءبىز ساۋداداعى ىنتىماقتاستىقتى تەرەڭدەتۋ تۋرالى قۇجاتقا قول قويدىق. بۇل قۇجاتتى ەو- عا مۇشە ەلدەر راتيفيكاتسيالاۋ ۇستىندە. وزگە ەلدەردىڭ دە قولداۋىن سۇرايمىن جانە سەنىم ارتامىن. قازىردىڭ وزىندە كوپتەگەن ەلدەر قۇجاتتى راتيفيكاتسيالادى. ءبىز وعان ريزاشىلىق بىلدىرەمىز» ، - دەدى نۇرسۇلتان نازاربايەۆ.

ەلباسى قازاقستان پوستكەڭەستىك كەڭىستىكتەگى ەلدەرمەن، تۇركيامەن ىنتىماقتاستىقتى جالعاستىرىپ، ورتا جانە تاياۋ شىعىسپەن دوستىق بايلانىستاردى تەرەڭدەتە تۇسەتىندىگىن اتاپ ءوتتى. لاتىن امەريكاسى، كاريب باسسەينى، افريكا قۇرلىعى وڭىرىندەگى سەرىكەستەرمەن دە قارىم- قاتىناستى دامىتا تۇسەتىندىگىن باسا ايتتى.

 

اۆتور: مارلان جيەمباي