07:23, 03 - شىلدە 2017 | GMT +6
اتىراۋ وبلىسىنداعى سارمات قورعاندارىنان قۇندى جادىگەرلەر تابىلدى
استانا. قازاقپارات - اتىراۋ وبلىسىنىڭ ستۋدەنتتەرى سارمات قورعانىنداعى قازبا جۇمىستارىنان قۇندى دۇنيەلەردى تاۋىپ الدى، دەپ حابارلايدى «قازاقپارات» ح ا ا ءتىلشىسى.
«ارحەولوگيالىق قازبا جۇمىستارى قاراباۋ وڭىرىندەگى سارماتتار ءومىر سۇرگەن كەزەڭدە قالعان قورعانداردىڭ ورنىندا جۇرگىزىلىپ جاتىر. قورعانداردىڭ بىرىنەن ءۇش مولا تابىلدى. مولالاردان التىننان جانە تەمىردەن جاسالعان بۇيىمدار، جەبە ۇشتارى، تۇرمىستىق كەرەك- جاراقتار تابىلدى. ءدال وسى قورعاندا تاعى بىرنەشە جەرلەنگەن ورىندار بار دەپ بولجاپ وتىرمىز»، - دەيدى ارحەولوگيالىق توپتىڭ جەتەكشىسى مارات قاسەنوۆ.
بيىلعى جىلى اتىراۋ وبلىسىنداعى ارحەولوگيالىق قازبا جۇمىستارىنا تۇڭعىش رەت «جاسىل ەل» باعدارلاماسى بويىنشا جاساقتالعان وتريادتار جۇمىلدىرىلىپ وتىر. اتالعان وڭىردە سارماتتار كەزەڭىنە تيەسىلى بارلىق جيىنى 100 گە جۋىق قورعان بار. ول قورعاندارعا ارحەولوگيالىق قازبا جۇمىستارى جۇرگىزىلمەگەن.
