ۇلتتىق مۋزەيدە ساق تايپاسىنىڭ التىن بۇيىمدارى تانىستىرىلدى - فوتو

استانا. قازاقپارات - ق ر ۇلتتىق مۋزەيىندە «ساق التىنى» ءتۇپنۇسقا ارتەفاكتىلەردىڭ حالىقارالىق كورمەسى اشىلدى، دەپ حابارلايدى «قازاقپارات» ح ا ا ءتىلشىسى.

كورمەگە ب. ز. د. VII- II ع ع. ساق مادەنيەتىنە تيەسىلى ق ر ۇلتتىق مۋزەيى، ورىنبور گۋبەرناتورلىق تاريحي- ولكەتانۋ مۇراجايىنىڭ جيناقتارىنىڭ جانە اتاقتى قازاقستاندىق رەستاۆراتور قىرىم التىنبەكوۆتىڭ كوللەكسيالارىنىڭ ۇزدىك ارتەفاكتىلەرى ۇسىنىلىپ وتىر.

اتاپ ايتقاندا، بەرەل، شىلىكتى، تاقساي، ارجان قورعاندارىنان تابىلعان ءتۇپنۇسقا التىن بۇيىمدار جانە 2013 -جىلى ورىنبوردان تابىلعان سارمات حانشايىمىنىڭ رەستاۆراتسيالانعان نۇسقاسى قويىلعان.



سالتاناتتى شارا ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ سوزىمەن اشىلدى.

«بۇگىنگى شارانى ەكسپو-2017 كورمەسى اياسىندا وتكىزىپ وتىرعانىمىز ءۇشىن قۋانىشتىمىن، سەبەبى بىرلەسكەن كورمە وتكىزۋدى جىلدار بويى ارمانداپ كەلدىك. وزدەرىڭىزگە ءمالىم، ساق جادىگەرلەرىنىڭ ەڭ قۇندى ولجاسى - ۇلتتىق مۋزەيىمىزدە تۇرعان «التىن ادام». بۇل قادامدارىمىز كورەرمەندەرگە عانا ەمەس، عىلىمعا دا وراسان زور پايداسىن تيگىزەرىنە سەنىمدىمىن»، - دەدى ول.

سونداي-اق، كورمە كۋراتورى، سۋرەتشى- رەستاۆراتور قىرىم التىنبەكوۆ تابىلعان جادىگەرلەردى رەستاۆراتسيالاۋ بارىسىندا جىلدامدىق پەن ۇقىپتىلىقتى قاتار ۇستانۋدىڭ ماڭىزدى ەكەنىن ايتتى. «ءبىزدىڭ زەرتحانا ارحەولوگيالىق ولجالار مەن مۋزەيدىڭ قۇندى بۇيىمدارىن كونسەرۆاتسيالاۋمەن جانە رەستاۆراتسيالاۋمەن اينالىسادى. بۇل ىستە بىزگە ءاربىر سەكۋند قىمبات، ءبىزدىڭ تاريحىمىز بەن مادەنيەتىمىزدى ايعاقتايتىن ەكسپوناتتىڭ تاعدىرىن سول سەكۋند شەشەدى. وتكەن جىلى مۋزەيگە مىڭداعان ارتەفاكتىلەر تاپسىردىق. ونىڭ كوپشىلىگى تەز جوعالاتىن ورگانيكادان قۇرالعان»، - دەدى عالىم.

ايتا كەتەيىك، اتالعان شارا ەكسپو-2017 كورمەسى اياسىندا ۇيىمداستىرىلىپ وتىر. «ساق التىنى» بۇيىمدارىنا دەيىن ق ر ۇلتتىق مۋزەيىندە «چين شىحۋاڭ يمپەراتوردىڭ تەرراكوتا اسكەرى»، «شامبالانى ىزدەۋ جولىندا: نيكولاي رەريحتىڭ نيۋ-يورك مۋزەيىندەگى جاۋھارلارى» جانە وزگە دە ەكسپوزيتسيالار ۇيىمداستىرىلدى.

  

اۆتور: ايجان سەرىكجان قىزى