استانادا الەمنىڭ ۇزدىك فوتوسۋرەتشىلەرىنىڭ جۇمىستارى كورسەتىلدى - فوتو
اتالعان كورمەدە جاپونيالىق شيگەرۋ يوشيدا، فرانسيالىق جان تيۋركو، تۇركيالىق يسمايل حايكير، امەريكالىق پاۆەل انتونوۆ جانە رەسەيلىك اندرەي مارتىنوۆ، تاتيانا زۋبكوۆا جانە شۇكىر شاحاي، اسىلحان ءابدىرايىم، ماقسات شاعىربايەۆ، تۇرار قازانعاپوۆ سىندى قازاقستاندىق تانىمال اۆتورلاردىڭ 200 گە جۋىق جۇمىسى كورسەتىلدى.
فوتوكورمەنى اشقان ق ر مادەنيەت جانە سپورت ءمينيسترى ارىستانبەك مۇحامەدي ۇلى فوتوسۋرەتشىلەردىڭ جۇمىستارىن جوعارى باعالادى. «ءبىز تاريحىمىزدى كورسەتەتىن قازىرگى زامانعى فوتومامانداردىڭ ەڭ تاماشا جۇمىستارىن جيناي الدىق. وكىنىشكە وراي، كورمەدەگى ءبىرقاتار فوتوسۋرەتتەردىڭ اۆتورلارى ومىردەن وزىپ كەتتى. ءبىراق، ولاردىڭ ارتىندا ولمەس تۋىندىلار قالدى. مۇنداي اۋقىمداعى فوتوكورمەنى تۇڭعىش رەت ۇيىمداستىرىپ وتىرمىز، سوندىقتان عاجايىپ فوتوكورمەنىڭ ۇيىمداستىرۋشىلارىنا ۇلكەن العىسىمدى بىلدىرەمىن»، - دەدى مينيستر.
فوتوونەر شەبەرلەرىنىڭ ءبىرى، جاپونيالىق ش. يوشيدا كورمەنىڭ وتكىزىلۋ دەڭگەيىنە جانە قازاقستان استاناسىنىڭ سۇلۋلىعىنا ەرەكشە تامسانعانىن جەتكىزدى. «مەنىڭ دوستارىم قازاقستان تۋرالى ەشتەڭە بىلمەيدى. مەن تۇندە استاناعا ۇشىپ كەلدىم جانە دەرەۋ دوستارىما حابارلاسىپ، العان اسەرىممەن ءبولىستىم. كورمەنىڭ وتكىزىلۋ دەڭگەيى دە مەن كۇتكەننەن الدەقايدا جوعارى بولدى. ءتۇرلى ەل مەن ءتۇرلى مادەنيەتتەردى فوتوسۋرەتكە ءتۇسىرۋ - ۇلكەن ونەر»، - دەپ اتاپ ءوتتى فوتوگراف.
قازاقستانداعى فوتوسۋرەت مايتالمانى اسىلحان ءابدىرايىم دا فەستيۆالدىڭ اشىلۋ سالتاناتىنا قاتىسىپ، قۇتتىقتاۋ لەبىزىن ءبىلدىردى. ول فوتوسۋرەتكە ارنالعان اۋقىمدى شارالاردىڭ ەلىمىزدەگى فوتوونەر سالاسىنىڭ دامۋىنا ىقپالىن تيگىزەتىنىن ايتتى.
«بۇگىن راسىندا كەرەمەت كۇن. بۇل حالىقارالىق فوتوفەستيۆال تۇڭعىش رەت قازاق جەرىندە ءوتىپ جاتىر جانە مۇنداي شارالار بولاشاقتا فوتوونەر سالاسىنىڭ دامۋىنا ۇلەس قوسىپ، جاستارىمىز وسى سالاعا بەت بۇرۋىنا، فوتوسۋرەت شەبەرلەرىنىڭ كوپتەپ شىعۋىنا ىقپالىن تيگىزەتىندىگىنە سەنىمدىمىن»، - دەدى ول.
فوتوفەستيۆال اياسىندا قاتىسۋشىلار ءۇشىن قورعالجىن، بۋراباي، باياناۋىل، ۇلىتاۋ، قارقارالى، تۇركىستان، وتىرار، شارىن، شىمبۇلاق، مەدەۋ، تامعالى تاس، كولساي سىندى كوز تارتارلىق ورىندارعا ارنايى ساپار ۇيىمداستىرىلادى.
وندا تۇسىرىلگەن فوتوتۋىندىلار «PHOTOfest.KZ» - گۇلدەنگەن قازاقستان الەمدىك فوتوگرافتار كوزىمەن» اتتى فوتو الماناحقا ەنەدى.
اۆتور: ايجان سەرىكجان قىزى
