وزبەكستان قازاعى لاۋازىمدى قىزمەتىن تاستاپ، قازاقستانعا ورالعىسى كەلمەيتىنىن اشىپ ايتتى
جيىنعا الەمنىڭ الىس جانە جاقىن 39 ەلىنەن 350 قانداسىمىز كەلدى. تاريحي وتانعا كورشى وزبەك ەلىنەن ات تەرلەتىپ كەلگەن سەرىكباي ۇسەنوۆ اتاجۇرتقا ورالۋعا اسىقپايتىنىن جەتكىزدى دەپ جازادى sputniknews.kz.
سەرىكباي ۇسەنوۆ - وزبەكستانداعى قازاق ۇلتتىق-مادەني ورتالىعىنىڭ ءتوراعاسى. سول جەردە تۋىپ-ءوسىپ، كوپ جىل مەملەكەتتىك قىزمەتتە ىستەگەن.
«اتا توپىراق قازاقستان بولسا، انا جەرىمىز وسى وزبەكستان ەلى، وسى جەردە ءوسىپ-ءونىپ جاتقان جاعدايىمىز بار. بالالارىم جوعارى وقۋ ورىندارىن ءبىتىردى. تەگىن وقىتتىم. لاۋازىمدار بەرىپ جاتىر. مەن ءوزىم ون ءتورت جىل ءۇش اۋدان اكىمىنىڭ ورىنباسارى، اكىم بولدىم. قاي قازاققا باسقا مەملەكەتتە وسىنداي جاسايدى ماسەلەن؟
سول سياقتى گەنەرال اعالارىمىز بار. بۇگىندە پرەزيدەنتىمىزدىڭ مەملەكەتتىك كەڭەسشىسى قازاق - تۇرسىنحان قۇدايبەرگەنوۆ. سول سياقتى ايدارقۇلوۆ دەگەن اعامىز ناۋاي ۋالاياتىنىڭ اكىمى، الىشەر عاپپار ۇلى ون جىلداي اۋدان اكىمى بولدى.
جەتپىس پايىز قازاقتار تۇراتىن جەردە، مىنە، قازاق اكىمدەرى دە ىستەپ جاتىر. بىزگە ەشقانداي كەدەرگى جوق. كونستيتۋتسيانىڭ سەگىزىنشى تارماعىندا جازىپ قويعان، بىزدە ۇلتقا قارامايدى»، - دەپ اڭگىمەلەدى سەرىكباي ۇسەنوۆ.
وسىلايشا، ول وزبەكستاندا قازاقتاردىڭ جاعدايى جاقسى ەكەنىن ايتتى. سوندىقتان اعا بۋىن اتاجۇرتقا اسىقپايدى، ال جاستاردىڭ ىنتاسى بار.
«جاعدايىمىز جاقسى، سوندىقتان قازاقستانعا كەلۋگە اسىقپايمىز. جاسىم الپىس ەكىدە، بۇل جاقتا تانىس تاۋىپ، باۋىر تاپقانشا، قانشا ءومىرىمىز قالعانىن بىلمەيمىز.
ەكى ۇلىم وسىندا بولسا، قىزىم الماتىدا تۇرىپ جاتىر. ءبىزدىڭ اسىعاتىن جەرىمىز جوق، نەمەرەلەرىمىز ەرتەڭ كەلۋى مۇمكىن. وقيمىن دەگەن جاستار بارىپ جاتىر»، - دەيدى ول.
