الەم بويىنشا تاراعان كومپيۋتەرلىك ۆيرۋستان زارداپ شەككەندەرگە ەۆروپول كەڭەستەرىن بەردى
ەۆروپول ەۋروپالىق قۇقىق قورعاۋ اگەنتتىگى زياندى باعدارلامالىق جاساقتاما تۋرالى وسىنداي پىكىر ءبىلدىردى، دەپ حابارلايدى «قازاقپارات» ح ا ا ءتىلشىسى.
«بۇل جاھاندىق ىقپالى بار، اقشا بوپسالاۋ ماقساتىنداعى تاعى ءبىر كۇردەلى شابۋىل. WannaCry شابۋىلىمەن ناقتى ۇقساستىقتارى بار، ءبىراق اناعۇرلىم جەتىلدىرىلگەن شابۋىل بەلگىلەرى بايقالادى»، - دەدى ەۆروپول باسشىسى روب ۋەينرايت.
ۆيرۋس تۋرالى العاشقى حاباردان سوڭ ەۆروپول شۇعىل ۇيلەستىرۋ كوميسسياسىن قۇردى جانە قازىرگى ۋاقىتتا ۆيرۋستىڭ تارالۋىن باقىلاپ وتىر. «شابۋىلدىڭ ىقپالىن باعامداپ، ءىس- ارەكەتتىۇيلەستىرىپ، كۇشىمىزدى بىرىكتىرۋ ءۇشىن ۆيرۋس جۇقتىرعان ەلدەردىڭ قۇقىق قورعاۋ ورگاندارىمەن جانە سالا بويىنشا نەگىزگى سەرىكتەستەرمەن تىعىز بايلانىستامىز»، - دەپ اتاپ ءوتتى ەۆروپولدان.
سونىمەن بىرگە، مەكەمە ازىرگە قانشا ادامنىڭ زارداپ شەككەنىن انىق ايتا المايتىندارىن جەتكىزدى جانە ۆيرۋستى جۇقتىرعان جاعدايدا حاكەرلەرگە ەشقاشان اقشا تولەمەۋگە كەڭەس بەردى. «سىزدەر قىلمىسكەرلەردى قارجىلاندىرىپ قانا قويماي، ءوز فايلدارىڭىزعا قول جەتكىزە الماي قالاسىزدار. بۇل اسىرەسە Petya ۆيرۋسى جاعدايىندا وتە وزەكتى، سەبەبى اقشا تالاپ ەتۋدى باسقارۋعا قولدانىلاتىن ەلەكتروندى پوشتانىڭ ەسەپ جازباسى بۇعاتتالدى»، - دەپ ەسكەرتتى ەۆروپولدان.
سونداي-اق، كيبەرشابۋىل بولعان جاعدايدا جەرگىلىكتى پوليتسياعا حابارلاسۋ كەرەك جانە قاسكويلەردەن كەلگەن ەلەكتروندى حاتتىڭ كوشىرمەسىن ساقتاۋ قاجەت. ودان بولەك، ۆيرۋس كىرگەن قۇرىلعىنى ينتەرنەتتەن اجىراتۋ قاجەت.
«ەگەر ۆيرۋس كىرگەن قۇرىلعى جەلىنىڭ ءبىر بولشەگى بولسا، ۆيرۋستىڭ وزگە كومپيۋتەرلەرگە تارالۋىنىڭ الدىن الۋ ءۇشىن، ونى دەرەۋ وقشاۋلاۋ قاجەت»، - دەيدى قۇقىق قورعاۋشىلار. «كاسپەرسكي زەرتحاناسىنىڭ» دەرەكتەرىنە سايكەس، شابۋىلعا ۇشىراعان قولدانۋشىلار سانى 2 مىڭعا جەتتى. ەڭ كوپ شابۋىل وقيعاسى رەسەي مەن ۋكراينادا تىركەلدى، سونداي-اق ۆيرۋس جۇقتىرۋ وقيعاسى پولشا، يتاليا ۇلىبريتانيا، گەرمانيا، فرانسيا جانە ا ق ش- تا بايقالعان.
اۆتور: ايجان سەرىكجان قىزى
