سولتۇستىك كورەيا وڭتۇستىك كورەيانىڭ ەكس-پرەزيدەنتىن سىرتتاي ءولىم جازاسىنا كەستى

استانا. قازاقپارات - سولتۇستىك كورەيا وڭتۇستىك كورەيانىڭ ەكس-پرەزيدەنتى پاك كىن حە مەن وڭتۇستىك كورەيالىق بارلاۋدىڭ باستىعى لي بەن حونى سىرتتاي ءولىم جازاسىنا كەستى، دەپ حابارلايدى قازاقپارات «ر ي ا جاڭالىقتار» اگەنتتىگىنە سىلتەمە جاساپ.

پحەنيان ولاردى سولتۇستىك كورەيانىڭ كوشباسشىسى كيم چەن ءىندى ءولتىردى دەپ ايىپتاۋدا. پحەنياننىڭ مالىمدەمەسىندە وسى ۋاقىتتان باستاپ پاك كىن حە مەن لي بەن حوعا اياۋشىلىققا ۇمىتتەنبەۋىنە بولاتىنى تۋرالى ايتىلعان.

ونىمەن قوسا، سولتۇستىك كورەيا حالىقارالىق زاڭنامالارعا سايكەس كۇدىكتىلەردى وزدەرىنە بەرۋدى تالاپ ەتىپ وتىر. «ا ق ش پەن ونىڭ وڭتۇستىك كورەياداعى جاندايشاپ كۇشتەرى كحدر- ءدىڭ جوعارى باسشىلىعىنا قارسى قايتادان مەملەكەتتىك تەرروريزم جاساماق بولسا، سوعىس كەزىنىڭ زاڭدارى بويىنشا ءسوز بايلاسۋدىڭ ۇيىمداستىرۋشىلارىنا، قاتىسۋشىلارى مەن ورىنداۋشىلارىنا جازانى الدىن الا ەسكەرتۋسىز ورىنداۋعا كىرىسەمىز»، - دەلىنگەن پحەنياننىڭ مالىمدەمەسىندە.

ەسكە سالايىق، وڭتۇستىك كورەيانىڭ پارلامەنتى وتكەن جىلدىڭ جەلتوقسان ايىندا پاك كىن حەنى بيلىكتەن شەتتەتكەن بولاتىن. اعىمداعى جىلدىڭ ناۋرىزىندا كونستيتۋتسيالىق سوت يمپيچمەنتتى قولداپ، ونى پرەزيدەنت لاۋازىمىنان تۇبەگەيلى بوساتتى. ال 2017 -جىلعى ناۋرىز ايىنىڭ سوڭىندا سەۋل سوتى پارا الدى، وكىلەتتىلىگىن اسىرا پايدالاندى، زاڭسىز قىسىم جاسادى جانە مەملەكەتتىك قۇپيانى جاريا ەتتى دەگەن ايىپپەن بۇرىنعى مەملەكەت باسشىسىن تۇتقىنداۋ تۋرالى سانكسيا بەردى. وعان 14 تارماق بويىنشا ايىپتار تاعىلدى.