قانات يسلام مۇگەدەك بالاعا قولعاپ سىيلاپ، الداعى وتەتىن ايقاسىنا بيلەت بەردى - كەسكىن

استانا. قازاقپارات - كاسىپقوي بوكسشى قانات يسلام مۇگەدەك بالاعا بىلعارى قولعابىن سىيلاپ، الداعى وتەتىن ايقاسىنا بيلەت بەردى، دەپ حابارلايدى قازاقپارات ءتىلشىسى.

بۇل تۋرالى قانات يسلامنىڭ PR مەنەدجەرى بەرىك سۇلتان فەيسبۋكتەگى پاراقشاسىندا جاريالاپ، ۆيدەو جۇكتەدى.

ۆيدەودا قانات مۇگەدەك بالاعا بىلعارى قولعاپ سىيلاپ، الداعى وتەتىن جارىسىنا كىرۋگە بيلەت بەرىپ جاتقانىن كورۋگە بولادى. سونداي-اق، بالالارعا بوكستىڭ قىر-سىرىن ۇيرەتىپ، رينگ سىرتىندا دا جەڭىسكە جەتۋدىڭ جولدارىن ءتۇسىندىرىپ جاتىر.

ال بەرىك سۇلتان بولعان وقيعا تۋرالى بىلاي جازدى.

«ءبىزدىڭ ماقسات - تەك رينگتەگى قارسىلاستى جەڭۋ ەمەس، ءبىزدىڭ ماقسات - قيىن جاعدايعا ۇشىراعان جانداردىڭ قايعىسىن جەڭۋگە دە كومەكتەسۋ. جۇزدەرىنە كۇلكى سىيلاپ، ءومىر سۇرۋگە قۇلشىندىرۋ! بۇل - ادامدىق بورىشىمىز. بۇل - QAZAQ كومانداسىنىڭ ماقساتى. جاقىندا عانا مەنىڭ ۋاتسابىما بەلگىسىز نومىردەن قاتارىنان بىرنەشە ۆيدەو كەلىپ ءتۇستى. اشىپ قاراسام د ت س پ مەن اۋراتىن بالانىڭ ۆيدەوسى. انىقتاپ تىڭداسام قانات يسلامعا سالەم جولداپ، «ءسىزدىڭ جەكپە-جەكتەرىڭىزدى ۇزبەي كورەمىن، ءسىز سياقتى بولعىم كەلەدى» دەيدى. قولىندا قولعابى بار. جۇرەگىم ەلجىرەپ كەتتى. ارەڭ قيمىلداپ، جاتتىعۋ جاساپ جاتىر. ۆيدەونى بىردەن قانات اعاعا كورسەتتىم. ول: «كەتتىك، بەرىك»، - دەدى».

ايتا كەتەرلىگى، امير «BI جۇلدىزاي» وڭالدىرۋ ورتالىعىندا ەمدەلەدى.

اۆتور: كۇنسۇلتان وتارباي