تۇركيانىڭ اقپاراتتىق پورتالىندا نازاربايەۆ تۋرالى ماقالا جاريالاندى
كولەمدى ماقالادا ەلباسى ن. نازاربايەۆتىڭ ومىربايانىمەن قوسا، ونىڭ الەمدىك ساياساتتاعى ەرەكشە قۇرمەتكە بولەنگەن تۇلعا ەكەنى تۋرالى ايتىلعان.
«نۇرسۇلتان نازاربايەۆ قازاقستان تاۋەلسىزدىك العان 1991 -جىلدان بەرى ەلىنە باسشىلىق جاساۋدا. 1991 -جىلدان بەرى تەك قانا قازاقستاننىڭ ەمەس، تۇركى الەمى مەن كوپتەگەن ەلدىڭ دە سەنىمىنە يە بولدى. حالىقارالىق قوعام ونى بەيبىتشىلىكتى جاقتايتىن ءبىر باسشى رەتىندە تانىپ، قاتتى قۇرمەتتەيدى»، - دەلىنگەن تۇركيالىق سايتتا جاريالانعان ماقالادا. اسىرەسە، اۆتور نۇرسۇلتان ءابىش ۇلىنىڭ سىرتقى ساياساتتاعى ادامگەرشىلىك تەڭدىك ۇستانىمى تۋرالى كەڭىنەن توقتالا وتىرىپ، قازاقستاننىڭ ب ۇ ۇ قاۋىپسىزدىك كەڭەسىنىڭ (ب ۇ ۇ ق ك) تۇراقتى ەمەس مۇشەسى رەتىندەگى «استانا پروتسەسىنە» ايرىقشا كوڭىل بولگەن.
«...نازاربايەۆ سىرتقى ساياساتتا بىردەي ۇستانىمنان گورى ءار مەملەكەتكە تەپە- تەڭ قاشىقتىقتا بولۋدى جاقتادى. كوپ ۆەكتورلى ءبىر سىرتقى ساياسات جۇرگىزۋدە. بۇل كوپ ۆەكتورلى ساياساتى سەبەپتى نازاربايەۆ حالىقارالىق قوعامدا «بىتىمگەر باسشى» بولىپ ەسەپتەلەدى. بارشاعا ءمالىم، نازاربايەۆ سيريا داعدارىسى مەن سيرياداعى گۋمانيتارلىق تراگەديانىڭ شەشىمى ءۇشىن ىسكە كىرىستى. رەسەي، يران جانە تۇركيانىڭ قولداۋىمەن وتكىزىلىپ جاتقان استانا پروتسەسىنە قوناقجايلىق جاسايدى. قازاقستاننىڭ كەلىسسوزدەرگە قوناقجايلىق جاساۋى سيريانىڭ ماڭىزدى اكتەرلەرىنىڭ ءبىرى رەتىندە تۇرىكمەندەردى دە استانا پروتسەسىنە قوسىپ، بولىمدى كوزقاراس قالىپتاستىرۋدا ىقپالدى بولدى»، - دەيدى اۆتور.
ايتا كەتكەن ءجون، بۇل ماقالا اتاتۇرىك ۋنيۆەرسيتەتى حالىقارالىق قاتىناستار كافەدراسى عىلىمي- زەرتتەۋ قىزمەتكەرى دجەميل دوعاچ يپەكتىڭ ساراپتاماسىنان اۋدارىلىپتى.
نازاربايەۆ تۇركى الەمىنىڭ ءتىل مەن ءالىپبي وداقتاستىعى ءۇشىن كۇش سالعان باسشى، دەپ باعا بەرەدى اۆتور.
«...بىرنەشە اي بۇرىن قازاقستانعا باردىم. قازاقستانداعى وزگەرىس پەن جاڭالىقتاردى كورۋ مۇمكىندىگىم بولدى. نازاربايەۆ قازىرگى زاماننىڭ تىنىس- تىرشىلىگىن وتە جاقسى ەسكەرگەن پرەزيدەنت. بۇل باعىتتا نازاربايەۆتىڭ لاتىن الىپبيىنە ءوتۋ تاپسىرماسى اسا ماڭىزدى. نازاربايەۆ 2025 -جىلىنا دەيىن بارلىق كىتاپتار، مەرزىمدى باسىلىمدار جانە رەسمي قۇجاتتاردى لاتىن الىپبيىمەن باسىپ شىعارۋ كەرەكتىگىن اتاپ كورسەتتى. بۇل شەشىم تۇركى الەمىنىڭ ءتىل مەن ءالىپبي وداقتاستىعى ءۇشىن اسا ماڭىزدى جانە ستراتەگيالىق ورتاق باستاما. نۇرسۇلتان نازاربايەۆتىڭ كوزقاراسى جانە ستراتەگياسىمەن تۇرلەنگەن «قازاق مودەلى» تۇركى وركەنيەتىنەن ءنار الادى. وسىنىڭ ارقاسىندا بۇل مودەلدە «تۇراقتىلىق» پەن «ەكونوميكالىق ءوسۋ» بايقالادى...»، - دەپ جازادى اۆتور.
اۆتور: بەيسەن سۇلتان
