باتىس قازاقستان وبلىسىندا ايشۋاق حاننىڭ قابىرى تابىلدى

استانا. قازاقپارات - باتىس قازاقستان وبلىسىندا ايشۋاق حاننىڭ قابىرى تابىلدى. ايشۋاق ءابىلقايىر ۇلى - كىشى ءجۇز بيلەۋشىلەرىنىڭ ءبىرى. باشقۇرتتار، كازاك- ورىستارمەن قاقتىعىس كەزىندە ەرلىگىمەن كوزگە تۇسكەن.

بۇعان دەيىن ەسىم حان مەن جانتورە ايشۋاق ۇلىنىڭ قۇلپىتاستارى تابىلعان ەدى. ەندى وسى ەكى تۇلعانىڭ ورتاسىندا حان بولعان ايشۋاقتىڭ دا جەرلەنگەنى جەرى ايقىندالىپ، بيلەۋشىنىڭ ومىرىنە قاتىستى ءتۇرلى دەرەكتەرگە نۇكتە قويىلدى. تابىلعان قۇلپىتاستا ايشۋاق حاننىڭ 1812 -جىلى 85 جاسىندا باقيلىق بولعانى جازىلعان. ياعني وسىعان دەيىنگى دەرەكتەردىڭ قاتە ەكەندىگى انىقتالدى.

وسىدان بەس جىل بۇرىن باستالعان «قۇلپىتاس كىلتىن اشايىق» جوباسى بويىنشا وڭىردەگى 3 مىڭعا جۋىق قۇلپىتاس زەرتتەلىپ، جۇزگە تارتا باتىر مەن ءدىن عۇلامالارىنىڭ قابىرى انىقتالعان. زەرتتەۋشىلەر وبلىستا 30 مىڭعا جۋىق كونە قۇلپىتاس بارىن ايتادى. ەگەر بۇل ەستەلىك بەلگىلەر زەرتتەلسە، تاريح بەتتەرى ناقتى دەرەكتەرمەن كوبەيەر ەدى. ءبىراق بۇل ءۇشىن عىلىمي- زەرتتەۋ ورتالىعىن قۇرۋ قاجەت. ال قازىر بۇل جۇمىستاردىڭ بارلىعىن ءوڭىر تاريحىنا جاناشىر جاندار ءوز كۇشىمەن تەگىن جاساپ جاتىر.

جانتاس سافۋللين، «جايىق پرەسس» ج ش س باس ديرەكتورى:

 قۇلپىتاستاردى جويۋ جۇمىستارى ارنايى جۇرگىزىلگەنىنە كۋا بولدىق. مىسالى، ءبورلى اۋىلى ماڭىنداعى متس عيماراتى. 1933-1934 -جىلدارى سالىنعان. سول اۋماقتىڭ اينالاسىنداعى بۇكىل قورىمداردىڭ قۇلپىتاستارىن سىندىرىپ اكەلىپ، سوعان فۋندامەنتكە سالىپ جىبەرگەن. اراب الىپبيىندە جازىلعان. ءبىر قىزىعى، ءاربىر قورىمدا ءبىر- ءبىر قۇلپىتاستان قالعان. سوعان قاراپ توپشىلاۋعا بولادى: اي، سول ءوزىمىزدىڭ قازاقتارعا كۇشتەپ بۇزدىرتقان- اۋ، سولار وزدەرى ەرتەڭ وسى جەردە ءبىر قورىم بولعاندىعىن ءبىلسىن دەپ، ءبىر قۇلپىتاستان بولسا دا سىندىرماي قالدىرىپ كەتكەن.

سول كەزدە ولار مىناداي سىلتاۋ ايتقان: «بۇل قۇلپىتاس كۇش بەرمەدى، تراكتور سىنىپ قالدى، ءۇيتىپ قالدى- ءبۇيتىپ قالدى» دەپ سىلتاۋىن ايتادى، سىندىرا المادىق دەيدى.