قازاقستانعا «ەجەلگى مىسىر ەسكەرتكىشتەرى» جەتكىزىلدى - فوتو
«مىسىر تاريحى - كونە تاريح. كونە تاريحپەن كومكەرىلگەن كورمەنىڭ اشىلۋ سالتاناتى قۇتتى بولسىن. بۇل كورمە مىسىر تاريحىن كەزەڭ-كەزەڭىمەن تانىستىراتىن ەكسپوناتتاردان قۇرالعان. مۇنداعى تاريحي تۋىندىلار وتكەن داۋىردەن مول ماعلۇمات بەرەدى. كورمەدەگى ەكسپوناتتار ەجەلگى ءداۋىر ادامدارىنىڭ تانىم-تۇسىنىگىن، مادەنيەتىن، سول داۋىردەگى قولونەر شەبەرلەرى تۋرالى مول مالىمەت بەرەدى. ق ر ۇلتتىق مۋزەيىندە وسى ايدا بىرنەشە حالىقارالىق كورمە وتكىزىلدى. مۇنداي كورمەلەر حالىقتىڭ تانىم كوكجيەگىن كەڭەيتۋگە سەپتىگىن تيگىزەدى دەپ ويلايمىن»، - دەپ اتاپ ءوتتى ق ر مادەنيەت جانە سپورت ۆيتسە-ءمينيسترى اقتوتى رايىمقۇلوۆا.
كورمەگە تۋتانحامون توپتاماسىنان بىرەگەي زاتتار قويىلدى: جارتىلاي اسىل تاستارمەن اشەكەيلەنگەن فاراوننىڭ التىن جالاتىلعان اعاش كۇيمەسى، جارتىلاي اسىل تاستارمەن اشەكەيلەنگەن التىن جالاتىلعان اعاش تاعى، سىرتقى ساركوفاگى، سىيعا بەرىلگەن زاتتارى بار قىزدىڭ ءمۇسىنى جانە جارتىلاي اسىل تاستارمەن كومكەرىلگەن التىن جاعا. سونىمەن قاتار، مىسىردىڭ باي تاريحى ديناستيالىققا دەيىنگى كەزەڭنەن باستاپ ورتا عاسىرعا دەيىنگى ارالىقتاعى ءارتۇرلى تاريحي كەزەڭدەردىڭ بۇيىمدارى مەن جادىگەرلەرى كورىنىس تاپقان.
مىسىر اراب رەسپۋبليكاسىنىڭ تۋريزم مينيسترلىگى حالىقارالىق قاتىناستار بويىنشا ءبىرىنشى ۆيتسە-ءمينيسترى احمەت شۋكري: «بۇل كورمە - قازاقستان مەن مىسىر ەلىنىڭ بىرلەسە وتىرىپ جاساعان ۇلكەن شاراسى. ەكى ەل اراسىنداعى دوستىق قارىم-قاتىناستىڭ ناتيجەسىندە قوس حالىقتىڭ ءوزارا سىيلاستىعى ارتا تۇسەدى دەپ سەنەمىن. بولاشاقتا حالىقتار دوستىعى ۇلكەن تابىسقا جەتكىزەتىنى ءسوزسىز. بۇگىنگى كورمە دە وسىنىڭ ناتيجەسى»، - دەپ ءوز پىكىرىن ءبىلدىردى.
