ب ۇ ۇ- نىڭ رۇقساتىنسىز سيرياعا اسكەر جىبەرمەيمىز - مينيستر ءابدىراحمانوۆ
استانا پروتسەسىنىڭ ءوزى ەلىمىزدىڭ ورتاق ىسكە قوسقان ۇلكەن ۇلەسى بولىپ سانالادى. ال قاقتىعىس ايماقتارىنا اسكەر جىبەرۋ ماسەلەسى تەك ب ۇ ۇ دەڭگەيىندە عانا قارالۋى شارت، دەپ حابارلايدى قازاقپارات ءتىلشىسى.
"سيريا داعدارىسى شەشۋ جولىندا قازاقستان دا، قىرعىزستان دا ەشكىمنىڭ ىقپالىنا تۇسپەيدى. ءيا، قازىرگى كەزدە اتالعان ەكى مەملەكەت ب ۇ ۇ- نىڭ بىتىمگەرلىك وپەراتسيالارىنا اتسالىسىپ كەلەدى.
قازاقستان مەن قىرعىزستان ءوز بىتىمگەرلىك كۇشتەرىن 16 ميسسيانىڭ قۇرامىندا قىزمەت اتقارۋعا دايىنداپ جاتىر. اتالعان ميسسيالاردا 125 مىڭ وفيتسەر مەن سولدات بار. سودان بولار، سيرياداعى دەەسكالاتسيا ايماقتارىنىڭ قاۋىپسىزدىگىن قامتاماسىز ەتۋ ماسەلەسىنە كەلگەندە قازاقستان مەن قىرعىزستان جايىندا ايتىلا باستادى"، - دەدى ءابدىراحمانوۆ ەۋرازيالىق مەديا فورۋمنىڭ بۇگىنگى سەسسياسىندا. اتالعان وتىرىس سيرياداعى داعدارىس ماسەلەسىنە ارنالدى.
ءمينيستردىڭ ايتۋىنشا، بىتىمگەرلىك كۇشتەردى بىرنەشە ۇيىمنىڭ اياسىندا پايدالانۋعا رۇقسات بار. وسى جولى قازاقستان مەن قىرعىزستاننىڭ بىتىمگەرلىك كۇشتەرىن ۇجىمدىق قاۋىپسىزدىك شارت ۇيىمىنىڭ اياسىندا قولدانۋ تۋرالى اقپارات شىقتى. "دەگەنمەن، اتالعان ماسەلە ب ۇ ۇ قاۋىپسىزدىك كەڭەسىندە قاراستىرىلعان جاعدايدا عانا قازاقستان ءوزىنىڭ بىتىمگەرلىك كۇشتەرىن قاقتىعىس ايماقتارىنا جىبەرەتىن بولادى. ۇيىمنىڭ رەسمي رەزوليۋتسياسى مەن مانداتى بەرىلۋى شارت. سوندا عانا قازاقستان دا، باسقا دا مەملەكەتەر بىتىمگەرلىك كۇشتەرىن ءتيىستى جەرگە جىبەرە الادى"، - دەپ اتاپ كورسەتتى مينيستر.
قايرات قۇدايبەرگەن ۇلى سيريا جەرىنە بىتىمگەرلىك اسكەردى جىبەرۋ بويىنشا رەسمي كەلىسسوزدەردىڭ جۇرگىزىلمەي جاتقانىن تاعى ءبىر مارتە ەسكە سالىپ، استانا پروتسەسىنىڭ ءوزى ەلىمىزدىڭ ورتاق ىسكە قوسقان ۇلكەن ۇلەسى ەكەنىن جەتكىزدى.
اۆتور: ارمان اسقاروۆ
