كۇن مەن جەل ەنەرگياسىنا ارزان نەسيە بەرىلە مە

استانا. قازاقپارات - قازاقستاننىڭ بالامالى ەنەرگەتيكا قاۋىمداستىعىنىڭ باس ديرەكتورى ارمان قاشقىنبايەۆتىڭ ايتۋىنشا، اتالعان ۇيىم بالامالى ەنەرگەتيكانى دامىتامىن دەيتىن ازاماتتارعا ارزان نەسيە بەرۋ ماسەلەسىن كوتەرگەن بولاتىن.

 وسى ورايدا ارنايى مەملەكەتتىك باعدارلامانى دا ازىرلەۋدى ۇسىندى، دەپ حابارلايدى قازاقپارات ءتىلشىسى.  ۇيىم باسشىسىنىڭ ايتۋىنشا، قازاقستاندا كۇن مەن جەل ەنەرگياسى سياقتى بالامالى قۋات كوزدەرىن دامىتۋعا بارلىق مۇمكىندىكتەر بار.

 «تەرريتوريامىز كەڭ. حالىقتىڭ سانى كوپ ەمەس. سوسىن ادامدار ءبىر- بىرىنەن شالعاي تۇرادى. ءدال سول شالعاي جاتقان اۋىلداردا كۇن مەن جەل ەنەرگەتيكاسىن دامىتقان ءتيىمدى. «ونداي اۋىلدار شالعايدا ورنالاسقاندىقتان ول جەردە شاعىن گيبريدتى قۇرىلعىلاردى ورناتىپ، ەنەرگيا وندىرگەن ءتيىمدى. ءۇندىستان، اۆستراليا جانە تاعى باسقا مەملەكەتتەردە سولاي ىستەيدى. كۇن مەن جەل ەنەرگياسى ارقىلى شالعاي اۋىلداردىڭ تۇرعىندارى توڭازىتقىش، ۇتىك، ۇيالى تەلەفون جانە تاعى باسقا قۇرىلعىلاردى زاريادتاي الادى. سوسىن سۋ سورعىشتارىنا قاجەتتى ەنەرگيانى ءوندىرىپ، باۋ- باقشا مەن ەگىستىك القاپتارىن سۋارۋعا مۇمكىندىك بار» ، - دەدى قاشقىنبايەۆ بۇگىن ەۋرازيالىق مەديا فورۋمنىڭ پانەلدىك سەسسياسىندا.

ونىڭ سوزىنە قاراعاندا، قازاقستاننىڭ بالامالى ەنەرگەتيكا قاۋىمداستىعى ارناي مەملەكەتتىك باعدارلامانى دا ازىرلەۋدى ۇسىنعان بولاتىن. «ءبىز ەنەرگەتيكا مينيسترلىگىنە بارىپ، ەكسپو- دان كەيىن ارنايى مەملەكەتتىك باعدارلامانى قابىلداۋدى ۇسىندىق. قازىر بالامالى ەنەرگەتيكاعا ارنالعان زاڭ مەن تۇجىرىمداما بار. ەندى، ءبىر مەملەكەتتىك باعدارلاما بولۋى قاجەت دەپ ويلايمىز. ونداي باعدارلامالار اۋىل شارۋاشىلىعى مەن قايتا وڭدەۋ سالاسىندا قابىلدانعان. بالامالى ەنەرگەتيكا سالاسىنا دا تەڭگەمەن، مىسالى، 5 پايىزدىق ۇستەمە اقىمەن اقشا بولۋگە بولاتىن ەدى. سوندا وسى سالاداعى كومپانيالار ديەۆالۆاتسيادان قورىقپايدى. ءوز باستامالارىن باتىل ىسكە اسىرادى. ءبىراق بىزگە ونداي اقشا ازىرشە جوق دەدى» ، - دەپ اتاپ كورسەتتى ۇيىم باسشىسى.

اۆتور: ارمان اسقاروۆ