شەتتەگى قازاق وتانىنا ورالعاندا ەرەكشە جاعداي جاساۋ قاجەت دەۋدەن اۋلاقپىز - فرانسيا قازاعى
مۇنداي پىكىردى ق ر پرەزيدەنتى نۇرسۇلتان نازاربايەۆتىڭ توراعالىعىمەن وتكەن دۇنيەجۇزى قازاقتارىنىڭ V قۇرىلتايىندا فرانسيانىڭ پاريج قالاسىنان كەلگەن كاسىپكەر مەحمەد زەنگين ءبىلدىردى، دەپ حابارلايدى قازاقپارات.
«بيىل الماتىدا تۇتىنۋ ونەركاسىبىنىڭ حالىقارالىق كورمەسى ءوتتى. وعان شەتەلدەن كەلگەن 40 قا جۋىق فيرمانىڭ اراسىندا مەن جالعىز قازاق بولدىم. كورمەدەن كەيىن بيزنەسىمدى وسىندا كوشىرىپ، وتانىما پايدا كەلتىرۋ شەشىمىن قابىلدادىم. ءبىراق، بۇل ءبىرشاما قيىن شارۋا ەكەن» ، - دەدى ول. كاسىپكەر شەتەلدەگى ءوندىرىسىن قازاقستانعا اۋىستىرۋ ءۇشىن جەر ساتىپ الۋ مۇمكىن ەمەستىگىن، جالعا الۋ دا وڭاي بولماي تۇرعاندىعىن ايتتى.
«باسقا دا قاعازباستىلىق كوپ. ءبىز، شەتەلدەگى قازاقتار ادام ۇيىنە ورالعاندا ولارعا ەرەكشە جاعداي جاساۋ قاجەت دەۋدەن اۋلاقپىز. دەگەنمەن باسقا شەتەلدىك ينۆەستورلارعا قاراعاندا شەتەلدەن كەلگەن قازاقتارعا جەڭىلدىكتەر بەرۋ كەرەك سياقتى. ولار ەلگە كەلسە تۇپىكىلىكتى قالادى. سوندىقتان تۋعان جەر باعدارلاماسىن جۇزەگە اسىرعاندا ەلگە كەلىپ كاسىبىن اشقىسى كەلەتىن قازاقتاردى قولداۋ تەتىكتەرى جاسالسا دەپ ويلايمىن» ، - دەدى مەحمەد زەنگين.
وسى رەتتە قازاقستان پرەزيدەنتى نۇرسۇلتان نازاربايەۆ ەلىمىزدە جەر ساتىلمايتىندىعىن باسا ايتتى. «ەلىمىزدىڭ زاڭى بويىنشا جەر ساتىلمايدى. ءبىراق، جەردى 49 جىلعا جالعا الىپ جۇمىس ىستەۋگە بولادى. بۇل ماسەلەنى شەشۋدى اۋىل شارۋاشىلىعى ءمينيسترى اسقار مىرزاحمەتوۆكە تاپسىرامىن. كەزدەسىپ، شەشىپ، جۇمىس ىستەيتىن بول» ، - دەدى ەلباسى.
اۆتور: مارلان جيەمباي
