يرانداعى قانداسىمىز قازاقتاردىڭ اتاجۇرتقا ورالۋىنا باستى كەدەرگىنى اتادى

استانا. قازاقپارات - يران يسلام رەسپۋبليكاسىنداعى قازاقتاردىڭ قازاقستانعا قونىس اۋدارۋداعى ەڭ باستى ماسەلەسى - ءوز ۇلتىن دالەلدەي الماۋى. بۇل تۋرالى قازاقپارات تىلشىسىنە دۇنيەجۇزى قازاقتارى قۇرىلتايىنا يران ەلىنەن كەلگەن قانداسىمىز زادسار كوپەنين بوكباي ايتىپ بەردى.

 «قۇرىلتايعا قاتىسۋ مۇمكىندىگىنە يە بولعانىما ەرەكشە قۋانىشتىمىن! بۇل الەمدەگى قازاقتار باس قوسىپ پىكىر الماساتىن، اتاجۇرتىمىزعا ورالۋعا جول اشاتىن مۇمكىندىك دەپ بىلەمىن. يراندا 10 مىڭنان استام قازاق بولاتىن، سونىڭ تەڭ جارتىسى قازاق ەلىنە قونىس اۋداردى. قازىر 5 مىڭنىڭ اينالاسىندا قانداسىمىز بار. ولار گورگان، بەندەر- تۇرىكمەن جانە گۇلىستان پروۆينتسياسىنىڭ گومباد قالالارىندا تۇرادى. نەگىزىنەن ساۋدامەن، وندىرىسپەن شۇعىلدانادى. قازىر مەملەكەتتىك قىزمەتتە ىستەيتىن جاستار دا كوبەيىپ كەلەدى» ، - دەيدى قانداسىمىز.

سونىمەن بىرگە ول يرانداعى قازاقتاردىڭ ءوز- سالت ءداستۇرىن، ءتىلىن مۇمكىندىگىنشە ساقتاۋعا تىرىسىپ كەلە جاتقانىن ايتادى. « ءبىز ءتىلىمىزدى، مادەنيەتىمىزدى اتالارىمىزدىڭ قاداعالاۋىنىڭ ارقاسىندا ساقتاپ كەلدىك. مەكتەپكە بارعاندا پارسى تىلىندە سويلەيمىز، ۇيگە كەلگەندە اكە- شەشەلەرىمىز ۇرسىپ، قازاق تىلىندە اڭگىمەلەسەتىنبىز. قازىر ءبىز دە بالالارىمىزعا سولاي ۇيرەتىپ جاتىرمىز. ءبىزدىڭ نەگىزگى اتا قونىسىمز ماڭعىستاۋ ءوڭىرى ەكەن. اللا بۇيىرسا، وسىندا ءبىرجولاتا كوشىپ كەلگىمىز كەلەدى. يران ەلىنەن قونىس اۋداراتىن قازاقتاردىڭ ەڭ باستى ماسەلەسى - قۇجات جۇمىستارى. ويتكەنى ءبىزدىڭ ءتولقۇجاتىمىزدا ۇلتىمىز كورسەتىلمەيدى. ءبارىمىز - تەك يراندىقپىز. ال، قازاقستاندا تۇراقتى تۇرۋ ىقتيارحاتىن الۋ ءۇشىن قازاق ەكەنىڭدى دالەلدەيتىن انىقتاما كەرەك، ونى يران ۇكىمەتىنەن الۋدىڭ مۇمكىندىگى جوق. مىنە وسى جاعداي يراننان قونىس اۋدارعان قازاقتاردى ۇلكەن اۋرە- سارساڭعا سالىپ وتىر» ، - دەيدى زادسار كوپەنين بوكباي.

 

اۆتور: ريزابەك نۇسىپبەك ۇلى